अर्जुन कार्की
बागलुङ – बागलुङ जिल्ला लिग फुटबल प्रतियोगिताको तेस्रो दिन बिहीबार रस आवर फुटसल, फ्युचर स्पोर्टस् क्लब र चिल्ड्रेन लाइफ स्पोर्टस् क्लब विजयी भएका छन् । रस आवरले मुलपानी खेलकुद विकास समितिलाई २–१, फ्युचरले पावर फिटनेस क्लबलाई र चिल्ड्रेन लाइफले युनिक स्पोर्टस क्लबलाई ८–० ले हराएको थियो ।

जिल्लाको बाङ्गेचौर खेलमैदानमा भएको समूह ‘ख’ अन्तर्गत खेलको पहिलो हाफको १४ औं मिनेटमा गणेश विसीको गोलबाट अग्रता लिएको रस आवरका लागिे दोस्रो हाफको छैटौं मिनेटमा शंखर थापाले गोल गरे । मुलपानीका सचिन केसीले दोस्रो हाफको २० औं मिनेटमा गोल फर्काएपनि टोलीले खेललाई बराबरी गर्न सकेन ।

अर्को खेलको पाँचौं मिनेटमा पूर्णबहादुर गुरुङले गरेको गोल फ्युचरको जितका लागि पर्याप्त रह्यो । जितसँगै फ्युचरले दुई खेलबाट ६ अंक जोडेको छ । पावर फिटनेसको २ खेलम १ अंक मात्र छ । अर्को खेलमा चिल्ड्रन लाइफले सहज जित हासिल गर्यो । जित सँगै चिल्ड्रेन लाइफको ३ खेलमा ७ अंक पुगेको छ । युनिक स्पोर्टस् क्लब ३ खेलमा लगातार हार बेहोर्दै प्रतियोगितबाट बाहिरिएको छ ।

अखिल नेपाल फुटबल संघ (एन्फा) को बार्षिक कार्यक्रम अनुसार बागलुङ जिल्ला फुटबल संघले आयोजना गरेको प्रतियोगितामा लिग विजेताले उपाधिसहित ५० हजार र दोस्रो हुने टोलीले २५ हजार रुपैयाँ प्राप्त गर्नेछन् । त्यस्तै प्रतियोगितामा सर्वोत्कृष्ट खेलाडी र अनुशासित टिमले २–२ हजार प्राप्त गर्नेछन् । उत्कृष्ट गोलकिपर, रक्षक, मिडफिल्ड, स्ट्राइकर र उच्च गोलकर्ताले समान १ हजार रुपैयाँ प्राप्त गर्ने संघले जनाएको छ ।

जिल्ला लिग अन्तर्गत शुक्रबार समूह ‘क’को बागलुङ स्पोर्टस् क्लब र रुद्रेपिपल युवा क्लब, समुह ‘ख’मा फयुचर स्पोर्टस् र रस आवर तथा मुलपानी र पावर फिटनेसबीच प्रतिस्पर्धा हुने जिल्ला फुटबल संघ बागलुङका महासचिव जय राजभण्डारीले जानकारी दिए ।