काठमाडौं (हाम्रो खेलकुद) – हिमालयन शेर्पा क्लब दोस्रो ललित स्मृति यु–१८ फुटबल प्रतियोगिताको क्वार्टरफाइनलमा पुग्ने अन्तिम टोली बनेको छ । प्रतियोगिता अन्तर्गत बुधबार क्वार्टरफाइनल पुग्न जित्नै पर्ने खेलमा शेर्पाले न्युरोड टिम एनआरटीलाई ६–४ ले पराजित गर्दै अन्तिमा आठमा प्रवेश गर्न सफल भएको हो ।

समूह ‘सी’ बाट जावलाखेल समूह विजेता तथा शेर्पा उपविजेता बन्यो । गतवर्षको उपविजेता टोली जगदम्बा लुम्बिनीको पनि समान ६ अंक भएपनि ३ टोलीको एकआपसको नतिजाको गोल भिन्नताको आधारमा जावलाखेल र शेर्पा अन्तिम आठमा पुग्न सफल भएका हुन्। शेर्पाको जितमा अविनाश गुरुङले ह्याट्रिक गरे । यस्तै बेल प्रसाद गुरुङले दुई तथा विशाल तामाङले एक गोल गरे । एनआरटीका लागि सजन राई, मनिस पौडेल, सनिस खड्गी र अशोक थापामगरले गोल गरे ।

सातदोबाटोस्थित एन्फा कम्प्लेक्सको खेल मैदानमा गोलको वर्षा भएको खेलमा शेर्पाले खेलको चौथो मिनेटमा नै अग्रता बनाएको थियो । शेर्पाका लागि बेल प्रसाद गुरुङले गोल गरेका थिए । एनआरटीका सजिन राईले १९ औं मिनेटमा बराबरी गोल फर्काए । तर, त्यो बराबरी गोल लामो समय टिकेन । २४ औं मिनेटमा बेल प्रसादले नै गोल गर्दै शेर्पालाई पुनः अग्रता दिलाए । बिशाल तामाङले ३२ औं मिनेटमा गोल गर्दै शेर्पालाई ३–१ को अवस्थामा पु¥यायो । ३७ औं मिनेटमा अविनाश गुरुङले गोल गर्दै खेललाई आफ्नो टिमको पक्षमा पारेको थियो । तर, पहिलो हाफको इन्ज्युरी समयमा मनिस पौडेलले गोल गर्दै गोल अन्तर कम गरे ।

दोश्रो हाफको ५४ औं मिनेटमा सनिस खड्गीले गोल गर्दै एनआरटीलाई ४–३ को स्थितिमा ल्याएका थिए । ६२ औं मिनेटमा अविनाशले गोल गर्दै गोल अन्तर बढायो । लगत्तै ६९ औं मिनेटमा अविनाशले गोल गर्दै ह्याट्रिक पुरा गर्दा शेर्पाले खेललाई ६–३ को स्थितिमा पुर्यायो । एनआरटीका अशोक थापामगरले खेलको इन्ज्युरी समयमा गोल गरेपनि त्यो एनआरटीलाई जिताउन पर्याप्त बनेन ।

यस्तै बुधबारै भएको अर्काे खेलमा मोरङ फुटबल क्लबले ब्रिगेड व्वाइजलाई २–० ले पारजित गर्यो । मोरङका लागि रोशन न्यौपाने र रोहित गिरीले गोल गरे ।

प्रतियोगिताको क्वार्टरफाइनल खेल बिहिबारबाट शुरु हुनेछ । क्वार्टर फाइनलको पहिलो खेलमा एपिएफले फ्रेन्डस् क्लबको सामना गर्नेछ । दोस्रो खेलमा सरस्वतीले त्रिभुवन आर्मी क्लबको सामना गर्नेछ ।