लन्डन (एजेन्सी)– बेल्जियमको राष्ट्रिय टोलीबाट प्रशिक्षण गर्दा घाइते भएपछि चेल्सीका स्ट्राइकर इडेन हाजार्डको गोलीगाठाको शल्यक्रिया गर्नु पर्ने भएको छ । टुबिजिको राष्ट्रिय फुटबल केन्द्रमा आइतबार अभ्यासका क्रममा उनलाई चोट लागेको थियो । उनको शल्यक्रिया भने लन्डनमा हुने भएको छ ।

चोट गम्भिर खालको भएकाले अब कम्तीमा आठ साता उनी मैदान बाहिर रहने अनुमान गरिएको छ । बेल्जियमले चेक गणतन्त्रणसँग हुने मैत्रीपूर्ण र त्यसपछि जुन ९ मा इस्टोनियविरुद्ध हुने विश्व कप छनोटमा उनको उपस्थिति हुने छैन ।

हेजार्डले चेल्सीको प्रि सिजन तयारी पनि गुमाउने सम्भावना छ । विश्व कप छनोटमा अहिले समूहको शीर्षस्थानमा रहेको बेल्जियमको दोस्रो स्थानको ग्रिसको भन्दा २ अंक बढी छ । यस्तोमा महत्वपूर्ण खेलाडी हेजार्डको भने टोलीलाई साथ नरहने भएको छ ।

आइतबार नै चेल्सीमा हजार्डको भविष्यलाई लिएर चर्चा सुरु भएको थियो । उनले पनि च्याम्पियन्स लिग विजेता रियल मड्रिडको प्रस्तावलाई आफुले सुनेको स्वीकारेका थिए । ‘हो मैले प्रस्ताव सुनेको हु । म उपाधि जित्न चाहन्छु । च्याम्पियन्स लिग जित्नु खुसीको विषय हो,’ उनले भनेका थिए,‘तर चेल्सी पनि च्याम्पियन्स लिग जित्न चाहन्छ । इमान्दारिता पूर्वक भन्नुपर्दा भविष्यमा के हुन्छ मलाई पनि थाहा छैन ।’