म्याड्रिड (एजेन्सी) – शनिबार राति रियल म्याड्रिडले युभेन्टसलाई हराउँदा कोलम्बियन मिडफिल्डर हामेस रोड्रिग्वेज दोस्रोपटक युरोपियन च्याम्पियन बने।  रियलसँग पर्याप्त खेल खेल्न नपाएका रोड्रिग्वेजकालागि यो उपलब्धि ‘पानी मुनिको ओभानो’ मात्र बन्यो।

कुनै खेलाडीकालागि च्याम्पियन्स लिगमा खेल्न पाउनु ठूलो उपलब्धि हुन्छ। त्यसमाथि लगातार दोस्रो पटक क्लब फुटबलमा सर्वाधिक चासो लिइएको प्रतियोगिता जित्न पाउनु आफैमा ठूलो प्रतिष्ठा हुने गर्दछ । रियल म्याड्रिडका मिडफिल्डर रोड्रिग्वेजले क्यामरामा जीतको खुशियाली त मनाए तर पर्दा पछाडी भने उनि खुशी देखिएनन् ।

जीत पछि ट्रफीसँगका केहि फोटो बाहेक उनि अन्य सामुहिक फोटोहरुमा देखा परेनन् । त्यस्तै विजयमा खुशियाली मनाउन छाड्दै मैदानबाट टिम बस जाने उनि पहिलो खेलाडी थिए ।

सन् २०१४को बिश्व कपमा प्रतियोगिताको उच्च गोलकर्ता रहदै रियलको नजरमा परेका रोड्रिग्वेजले हाल जिदानको टोलीमा पर्याप्त समय खेल्न पाएका छैनन् । सिजनको सुरुवातबाटै सुरुवाती एघारमा स्थान नपाएका उनले केहि समययता वैकल्पिक खेलाडीमा पनि स्थान पाएका छैनन्।

जिदानको प्रशिक्षणमा रियलले लगातार दुइ पटक च्याम्पियन्स लिग जित्दा रोड्रिग्वेज दुवै पटक बेन्चमा रहेपनि मैदान प्रवेश गर्न भने पाएनन् ।