काठमाडौं (हाम्रो खेलकुद)– एन्फा महिला लिग च्याम्पियनसिपको फुटबल प्रतियोगिताको क्वार्टरफाइनल समिकरण पुरा भएको छ । अखिल नेपाल फुटबल संघ (एन्फा) को कार्यक्रम अनुसार पाल्पा र स्याङ्जामा संयुक्त रुपमा जारी प्रतियोगितामा आइतबार अन्तिम आठमा पुग्ने टोलीको टुंगो लागेको हो ।

स्याङ्जामा समूह ‘क’ बाट रौतहट, समूह ‘ख’बाट सर्लाही, समूह ‘ग’ बाट मोरङ र समूह ‘घ’ बाट नवलपरासी अघिल्लो चरणमा पुगेका छन् । त्यस्तै पाल्पामा समूह ‘क’ बाट काठमाडौं, समूह ‘ख’बाट झापा, समूह ‘ग’बाट ताप्लेजुङ र समूह ‘घ’बाट कैलाली नकआउट चरणमा पुगेका हुन् ।

पाल्पामा आइतबार कैलाली र ताप्लेजङ विजयी भए । कैलालीले चितवनलाई ५–० ले हरायो । कैलालीका लागि गंगा अधिकारीले पाँचौं र पहिलो हाफमो इन्जुरी समयको दोस्रो मिनेटमा,सुस्मिता दवाडीले ३८ औं, महिमा चौधरीले ५५ औं र हेमा चौधरीले ७९ औं मिनेटमा गोल गरेका थिए ।

अनुष्का शेर्पा र गिता रानाको समान २ गोल गर्दै ताप्लेजुङले सिन्धुपाल्चोकलाई ५–० ले पराजित गर्यो । अनुष्काले ३० औं र ७८ औं, गिताले ४६ औं र ७७ औं तथा भुजुङ्गा राईले २६ औं मिनेटमा गोल गरेका थिए । पाल्पामै भएको अर्को खेलमा सप्तरी र सिन्धुलीले गोलरहित बराबरी खेलेका थिए ।

स्याङ्जामा बार्दिया र मोरङ विजयी भएका थिए । अर्को खेलमा नवलपरासी र नुवाकोटले १–१ को बराबरी खेले । नुवाकोटका लािग सुजिता तामाङले २९ औं मिनेटमा गोल गरिन् भने उदय थापाले ७९ औं मिनेटमा नवलपरासीका लागि बराबरी गोल फर्काइन् ।

सपना थारुको ह्याट्रिकसँगै बर्दियाले धनुषालाई ८–० ले हराएको छ । सपनाले छैटौं, ५० औं र ७० औं मिनेटमा गोल गर्दै ह्याट्रिक पुरा गरिन् । एकतर्फी खेलमा विजयी टोलीका लागि अजिता घर्तीमगरले सातौं र ७७ औं मिनेटमा, आशा शाहीले २७ औं , मन्जु थारुले ७८ औं र निरु आचार्यले ८० औं मिनेटमा गोल गरेका थिए ।

अर्को खेलमा रेश्मा राईको दुई गोलसँगै मोरङले बारालाई ३–० गोलले हरायो । दोस्रो मिनेटमा पहिलो गोल गरेकी रेशमाले अर्को गोल ८० औं मिनेटमा गरिन् । त्यसबीचमा टोलीका लागि आशा लिम्बुले ४४ औं मिनेटमा गोल गरेकी थिइन् ।

प्रतियोगितामा सोमबार क्वार्टरफाइनल खेल हुनेछन् । पाल्पामा काठमाडौं र झापा तथा ताप्लेजुङ र कैलालीबीच प्रतिस्पर्धा हुनेछ । त्यस्तै स्याङ्जामा रौतहटले सर्लाही र मोरङले नवलपरासीको सामना गर्नेछ ।