एजेन्सी – शनिबार राति हुने युरोपेली च्याम्पियन्स लिगको फाइनल खेलमा स्पेनी लिग च्याम्पियन रियल म्याड्रिड र इटालियन लिग र कप विजेता युभेन्टस भिड्दैछन्। प्रतियोगिता इतिहासमा पहिलोपटक उपाधि रक्षा गर्ने दाउमा रहेको रियल म्याड्रिड जारी च्याम्पियन्स लिग सिजनमा सबैभन्दा धेरै गोल गर्ने टोली पनि हो।

फाइनलखेल अघि प्रशिक्षक जिनेदिन जिदानलाई टोली छनोटको विषयमा सिजनकै सबैभन्दा ठुलो निर्णय लिनुपर्ने दबाव रहेको छ। प्रशिक्षणमा फर्किएका स्टार फरवार्ड ग्यारेथ बेल र ड्यानी कार्भाजललाई सुरुवाती एघारमा राख्ने कि नराख्ने भन्ने दुविधा रहेकाले जिदान अन्तिम समयसम्म कुर्न बाध्य छन्।

बेलको अनुपस्थितिमा उत्कृष्ट प्रदर्शन गरिरहेका मिडफिल्डर इस्कोलाई सुरुवाती एघारमा सामेल नगर्नु उत्तिकै गार्हो रहेको र विश्वकै सबैभन्दा महँगो खेलाडी वैकल्पिकखेलाडीका रुपमा रहँदा जिदानमाथि थप दबाव पर्ने देखिन्छ। बेलले चोटबात फर्किएयता कुनै खेल नखेलेपनि उनले एक सातादेखि नियमित प्रशिक्षण गर्दै आएका छन्।

अर्का डिफेन्डर ड्यानी कर्भाजलपनि चोटका कारण विश्राममा रहेर प्रशिक्षणमा फर्किएका छन्। उनको विकल्पमा राम्रो खेलाडी नभएका हुनाले उनलाई प्रशिक्षक जिदानले सुरुवाती एघारमा राख्ने देखिन्छ।

जिदानले ग्यारेथ बेललाई सुरुवाती एघारमा नराख्ने सम्भावना प्रबल रहेकाले इस्कोले सुरुवाती एघारमा खेल्नेछन्। इस्कोले सुरुवात गरेको खण्डमा म्याड्रिडले ४-३-१-२ पद्दतिमा खेल्नेछ।

म्याड्रिडको सम्भावित टोली:

केलर नाभास

ड्यानी कर्भाजल – सर्जियो रामोस – राफेल भारान – मार्सेलो

टोनी क्रुस – क्यासेमिरो – लुका मोड्रीच

इस्को

क्रिस्टियानो रोनाल्डो – करिम बेन्जेमा