काठमाडौं, कात्तिक १३- म्याच फिक्सिङ आरोपमा पक्राउ परेका राष्ट्रिय फुटबल टोलीका पूर्व कप्तान सागर थापासहित पाँच खेलाडीलाई प्रहरीले आइतबार मात्र विशेष अदालतमा उपस्थित गराउने भएको छ । खेलाडीसँगको बयान नसकिएको भन्दै विशेषले पक्राउ परेको दिनदेखि लागु हुने गरि १७ दिन न्यायिक हिरासतमा राख्न आदेश दिएको थियो । १७ दिन शुक्रबार पुरा हुँदैछ ।

म्याच फिक्सिड आरोपमा पक्राउ परेका खेलाडी ।

शनिबार विदा भएकाले आइतबार मात्र खेलाडीलाई विशेष लान लागिएको हो । महानगरिय प्रहरी अपराध महाशाखाका एसपी विश्वराज पोखरेलले खेलाडीलाई आइबार विशेष लगिने जानकारी दिए ।
सन् २००८ देखि विभिन्न अन्तराष्ट्रिय खेलमा म्याच फिक्सिङ गरेको आरोपमा प्रहरीले असोज २७ गते सागरसहित सन्दीप राई, अन्जन केसी, रितेश थापा र विकाससिंह क्षेत्रीलाई पक्राउ गरेको थियो । म्याच फिक्सिङमा कारवाही गर्ने नेपालमा स्पष्ट कानुनी व्यवस्था नभएका कारण प्रहरीले उनीहरु विरुद्ध राज्यविरुद्धको अपराधमा मुद्दा चलाउने प्रयास गरिरहेको छ । त्यहि सिलसिलामा विशेषले बयान सुरु भएपनि सकिएको छैन । प्रहरीले फिक्सिङगरेको खेलाडीले स्वीकारेको दाबी गरेपनि बयानका क्रममा खेलाडीले विशेषमा उपस्थित हुने क्रममा आफुहरु निर्दोष रहेको बताएका थिए ।
स्पोर्टस राडार सेक्युरिटी सर्भिस, नेपाल प्रहरी र आफनो संयुक्त पहलमा पाँच खेलाडी फिक्सिङमा संलग्न गरेहेको एसियाली फुटबल महासंघ (एएफसी) ले उनीहरु पक्राउ परेको केही दिनमा सार्वजनिक गरेको थियो । पाँच खेलाडीमाथि अनुसन्धान चलिरहेकाले एएफसी र अलिख नेपाल फुटबल संघले उनीहरुलाई तत्कालका लागि निलम्बन गरिसकेको छ ।