लेस्टर (एजेन्सी) – लेस्टर सिटीका मिडफिल्डर रियाल माहरेजले क्लब छाड्ने निर्णय गर्दै क्लब समक्ष ट्रान्सफरको अनुरोध गरेका छन्। उनले क्लबसामु आफुलाई अर्को स्तरको टोलीमा खेल्न मन लागेकाले यस्तो निर्णय लिनुपरेको बताए।

चार सिजन अघि २०१४ को जनवरीमा लेस्टरसँग आबद्ध भएका माहरेजले लेस्टरलाई प्रिमियर लिगमा बढुवा गराउन महत्वपूर्ण भूमिका निर्वाह गरेका थिए । लेस्टरसँगको लिग जित्दाको अकल्पनीय सिजनमा पनि माहरेजको महत्वपूर्ण भूमिका थियो । उनले क्लबकालागि सबै प्रतियोगितामा ३९ खेल खेल्दै १८ गोल गरेका थिए ।

साबिक बिजेताको रुपमा यस सिजन प्रिमियर लिगमा आफ्नो उपस्थिति जनाएको लेस्टरको निराशाजनक प्रदर्शन पछि माहरेजले आफ्नो निर्णय क्लब समक्ष प्रस्ट गरेका हुन् ।

“क्लब प्रतिको इमान्दारीका कारण मैले गत सिजन क्लबसँगै रहें। तर अब मैले आफ्नो व्यक्तिगत करियर अगाडी बढाउन यो क्लब छोड्ने सहि समय रहेको जानकारी दिएको छु ” , माहरेजले सार्वजनिक गरेको विज्ञप्तिमा उल्लेख छ । “मैले लेस्टरमा चार राम्रो सिजन बिताउन पाएँ। क्लबको ऐतिहासिक सफलतामा साथ दिन पाउँदा मा एकदम खुसि छु। मेरो क्लब र समर्थकसँगको नाता सदा रहने छ र म आशा गर्दछु समर्थकहरुले मेरो निर्णय बुझ्ने छन् । “