म्याड्रिड (एजेन्सी) – लियोनल मेस्सीको उत्कृष्ट प्रदर्शनमा बार्सिलोनाले अलाभेसलाई ३-१ ले हराउदै लगातार तेस्रो पटक कोपा डेल रे को उपाधी आफ्नो नाम गरेको छ । बार्सिलोनाको जितमा मेस्सीले १ गोल गर्दै १ असिस्ट दिए भने नेइमार र फ्रान्सिस्को अल्कासरले पनि गोल गरे ।

खेलमा सुरुवातदेखि हावी हुँदै बलमा आफ्नो पकड रहेपनि अलाभेसको मिडफिल्डमा राम्रो तालमेलको कारण बार्सिलोनालाई गोल गर्न त्यति सहज भएन । छैटौं मिनेटमा मेस्सीको राम्रो प्रयासमा जोर्डी अल्बा गोलको नजिक पुगेपनि बार्सिलोनालाई पहिलो गोल गर्न ३३ मिनेट पर्खनु पर्यो । मेस्सीको १८ यार्डको गोलबाट खेलमा पछि परेको अलाभेसले ३ मिनेटपछि थियो हेर्नान्डेजको उत्कृष्ट फ्रिकिकमा गोल फर्काउदै बराबरी गर्यो ।

४५औं मिनेटमा नेयमारले आन्द्रे गोमजको पासमा गोल गर्दै बार्सिलोनाको अग्रता पुनः स्थापित गरे । नेइमार अफसाइड पोजिसनमा रहेको भन्दै अलाभेसका खेलाडीले अपिल गरेपछि उनको गोल विवादास्पद रह्यो । त्यसको केहि समयमै पाको अल्कासरले मेस्सीको पासमा गोल गरेपछि पहिलो हाफमा बार्सिलोनाले खेल आफ्नो काबुमा राख्न सफल भयो । मेस्सीलाई डिफेन्डरहरुले रोक्न असफल भएपछि उनले अल्कासरलाई मिलाएको पास सदुपयोग गर्दै बार्सिलोनाको तेस्रो गोल भएको थियो।

दोस्रो हाफको सुरुवातमा अल्कासरको प्रयासलाई अलाभेसको गोलकिपरले रोक्दै खेलमा जीवित राखेपनि दोस्रो हाफमा दुवै टोलीबाट कुनै गोल हुन सकेन । ९६ वर्षपछि कोपा डेल रेको फाइनल प्रवेश गरेको अलाभेसलाई हराउदै बार्सिलोनाले प्रशिक्षक लुइस एन्रिकेलाईलाई सुखद बिदाई गर्यो ।

हाइलाइट्स