काठमाडौँ (हाम्रो खेलकुद) – साविक विजेता त्रिभुवन आर्मी क्लबले ललित स्मृति यू-१८ फुटबल प्रतियोगिता अन्तर्गत पहिलो खेलमा सुदुरपश्चिम फुटबल क्लबलाई २-०ले पराजित गर्दै सुखद सुरुवात गरेको छ।

प्रतियोगिताको दावेदार टोली मानिएको त्रिभुवन आर्मी क्लबले दुवै हाफमा १/१ गोल गरेको थियो। उसका लागि १४औं मिनेटमा विश्वास उदासले गोल गर्दै अग्रता दिलाएका थिए। राइट ब्याक विश्वासले ओभरल्यापमा गएको अवस्थामा २ खेलाडीलाइ छलाउँदै डी-बक्स बाहिर गरेको प्रहार गोलरक्षकको हात मुनिबाट छिरेर गोलमा परिणत भएको थियो। आर्मीले थुप्रै अवसरहरु पाएपनि फरवार्डहरु गोल गर्नबाट चुकेका थिए।

दोश्रो हाफमा दोर्जे तामाङले ६५औं मिनेटमा गोल गर्दै आर्मीको अग्रता दोब्बर पारेका थिए। उनले बक्समा क्लिएर नभएको बललाई पोष्टको दिशा दिंदै आर्मीलाइ जिततर्फ लागेका थिए। खेलको अन्तिम समयमा प्रेजेन तामाङले २ ओटा सुवर्ण मौका गुमाउँदा आर्मीले थप गोल गर्नबाट बन्चित भएको थियो।

जितपछि आर्मीका प्रशिक्षक चक्र तामाङले पहिलो खेल भएकाले टोलीमा तालमेलको कमि रहेको बताए। उनले आउने खेलमा टोलीको प्रदर्शनमा थप सुधार आउने बताए। पराजित टोलीका प्रशिक्षक ललित चन्दले खेलाडीहरुले आर्मीसँग खेल्दा मनोवैज्ञानिक रुपमै हरेस खाएकाले सोचेअनुरुप प्रदर्शन गर्न नसकेको बताए। उनले टोलीका मुख्य खेलाडी खेल्न नसक्दा केहि असर परेको र अर्को खेलमा सुधार गर्ने जानकारी दिए।