एजेन्सी – प्रशिक्षक फर्नान्डो सान्टोसले अर्को महिने हुने पोर्चुगलका अन्तर्राष्ट्रिय खेलहरुका लागि २४ सदस्यीय टोली घोषणा गरेका छन्। पोर्चुगलले रसियामा हुने कन्फेडेरेसन कपका साथसाथै साइप्रससँग मैत्रीपूर्ण खेल र लाट्भीयासँग विश्वकप छनोट अन्तर्गतको खेल खेल्दैछ।

रियल म्याड्रिडका स्टार फरवार्ड क्रिस्टियानो रोनाल्डोको कप्तानीमा घोषित टोलीमा युरो २०१६को फाइनलमा गोल गरेका एडर र युरो २०१६का उत्कृष्ट युवा खेलाडी रेनाटो स्यान्चेस परेनन्। कन्फेडेरेसन कपका लागि जर्मनीली आफ्नो स्टार खेलाडीलाई विश्राम दिएर युवा खेलाडीलाई प्राथमिकता दिएको छ।

पोर्चुगलको टोलीमा नानी, पेपे, रिकार्डो करेज्मा, जोआओ मौटिन्हो, ब्रुनो आल्भेस, रुइ प्याट्रीसियो, लगायतका सिनियर खेलाडीको पनि उपस्थिति रहनेछ। बार्सिलोनाका आन्द्रे गोमेस, इन्टर मिलानका जोआओ मारियो र मोनाकोका बर्नार्डो सिल्भा पनि टोलीमा अटाएका छन्।

जुन १७ बाट सुरु हुने कन्फेडेरेसन कपको समूह ‘ए’मा रहेको पोर्चुगलले आयोजक रसियासँगै मेक्सिको र न्युजील्याण्डको सामना गर्नेछ।

पूर्ण टोली:

गोलरक्षक: बेटो, जोसे सा, रुइ प्याट्रीसियो

डिफेन्डर: ब्रुनो आल्भेस, सेड्रिक सोआरेस, एलिसेउ, जोसे फोन्ट, लुइस नेटो, नेल्सन सेमेडो, पेपे, राफेल गुरेरो

मिडफिल्डर: एड्रीएन सिल्भा, आन्द्रे गोमेस, ड्यानिलो परेरा, जोआओ मरियो, जोआओ मौटिन्हो, पिज्जी, विलियम कार्भाल्हो

फरवार्ड: आन्द्रे सिल्भा, बर्नार्डो सिल्भा, क्रिस्टियानो रोनाल्डो, जेल्सन मार्टिन्स, नानी, रिकार्डो करेज्मा