लन्डन (एजेन्सी)– म्यानचेस्टर युनाइटेडका सर्वाधिक गोल गर्ने खेलाडी वायन रुनीले क्लब छोड्ने संकेत गरेका छन् । उनले खेल जीवनको अर्को कदमका लागि आफुसँग थुप्रै विकल्प रहेको उल्लेख गर्दै क्लब छोड्न सक्ने जनाएका छन् ।

युनाइटेडका कप्तान समेत रहेका उनले भविष्यका लागि आफुसँग धेरै प्रस्ताव आएको दाबी गरेका छन् । जोजे माउरिन्हो युनाइटेडको प्रशिक्षकका रुपमा युनाइटेडमा आबद्ध भएयता रुनीले कमै मात्र खेल्ने अवसर पाएका छन् । जसका कारण पनि उनी क्लब छोडेर जाने अड्कलबाजी केही समयअघि चल्दै आएको छ ।

यद्दपी बुधबार मात्र माउरिन्होले ३१ बर्षे रुनी क्लबमै रहने विश्वास व्यक्त गरेका छन् । तर, उनको नेतृत्वमा रुनी यो सिजन प्रिमियर लिगमा १५ खेलमा मात्र पहिलो रोजाइमा पर्न सके । बढी भन्दा बढी मैदानमा बिताउने रुनीको चाहना रहेकाले पनि उनले ओल्ड ट्राफर्ड छोड्ने अड्कल गरिदै आएको छ ।

‘इङल्यान्ड र बाहिरबाट पनि थ्रुपै प्रस्ताव आइरहेका छन् ’ रुनीले भने, ‘त्यसले मैले त्यसमा निर्णय त गर्नुनै पर्दछ । आउने केही सातामा मैले निर्णय लिनुपर्नेछ । त्यसका लागि म परिवारसँग सल्लाह गर्ने छु र अनि निर्णय गर्नेछु । फुटबललाई मध्यनजर गर्दै म निर्णय लिनेछु ।’ उनले थपे,‘यो बर्ष म न रिसाए र न निशास भए । टोलीका लागि जे आवश्यक छ त्यो मैले बुझेको छु । प्रशिक्षकले मलाई जहाँ मौका दिए मैले त्यसमा राम्रो गर्ने प्रयास गरे । निश्चय नै म खेल्न चाहन्छु , जति सम्भव हुन्छ मैदानमा बिताउन चाहन्छु ।’