काठमाडौं (हाम्रो खेलकुद) – मलेसिया भ्रमणमा रहेको नेपाली राष्ट्रिय महिला फुटबल टोलीले भोली घरेलु टोलीसँग दोस्रो मैत्रीपूर्ण खेल खेल्दैछ । नेपाल र मलेसियाबीचको सोमबार भएको पहिलो मैत्रीपूर्ण खेल १–१ को बराबरीमा टुंगिएको थियो । प्रशिक्षक कुमार थापा अघिल्लो खेलकै पहिलो रोजाईलाई उतार्ने तयारीमा छन् ।

पहिलो खेलमा १–० ले पछि परेको नेपालले ६७ औं मिनेटमा बराबरी गोल फर्काउँदै हार टारेको थियो । सावित्रा भण्डारीले गोल खाएको तिन मिनेटमै बराबरी गोल गरेकी थिइन् । सावित्राकै गोलमा नेपालले ५ महिनाअघि एन्फा कम्प्लेक्स सातदोबाटोमा भएको मैत्रीपूर्ण खेलमा मलेसियालाई १–० ले हराएको थियो ।

युएमएस रंगशालामा हुने दोस्रो खेलमा पहिलाको तुलनामा प्रदर्शनमा सुधार हुने प्रशिक्षक थापाको विश्वास छ । ‘हाम्रा खेलाडी सुरुमा केही दबाबमा देखिएका थिए । मलेसियन खेलाडीले फिजिकल्ली खेले,’ थापाले हाम्रो खेलकुद डट कमसँग भने,‘ तर २० मिनेटपछि हाम्रो टोलीले स्वभाविक प्रदर्शन गर्दै लय समात्यो । मलाई विश्वास छ दोस्रो खेलमा प्रदर्शन सुधारिनेछ ।’ दोस्रो खेलको पहिलो रोजाईका बारेमा उनले थपे,‘हामी पुरानै ११ बाट सुरु गर्नेछौं । सम्भवतः दोस्रो हाफमा केही खेलाडी परिवर्तन गरिनेछ ।’

खेल मलेसियाको स्थानिय समय अनुसार ३ः४५मा सुरु हुने थापाले जानकारी दिए ।

नेपालको सम्भावित पहिलो रोजाई:

एन्जिला सुब्बा (गोलकिपर), सजना राना (कप्तान), पुनम जर्घा मगर, हिरा कुमारी, गिता राना, सावित्रा भण्डारी, अनिता बस्नेत, रेणुका नगरकोटी, मनमाया लिम्बु , अञ्जली कुमारी, दिपा राई