लिभरपुल (एजेन्सी)– प्रिमियर लिगको अन्तिम दिन आइतबार लिभरपुल र म्यानचेस्टर सिटीले जित हासिल गर्दै शीर्ष चारमा स्थान पक्का गरेका छन् ।

सिटीले वाटफर्डलाई ५–० ले हराउदै तेस्रो स्थानमा सिजन अन्त्य गर्दै अर्को सिजनको च्याम्पियन्स लिगमा स्थान पक्का गरेको छ । घरेलु मैदानमा यसै सिजन रेलिगेसनमा परेको मडल्सब्रोलाई ३–० ले हराउदै लिभरपुल चौथो स्थानमा रह्यो । लिभरपुलले अर्को सिजन च्याम्पियन्स लिगको समूह चरणमा अटाउन प्ले अफमा अनुकुल नतिजा निकाल्नु पर्ने छ । त्यस्तै १० खेलाडीमा सिमित आर्सनलले एभर्टनलाई ३–१ ले हराएपनि पाचौ स्थानमा अन्त्य गरेपछि २० वर्ष यता पहिलो पटक च्याम्पियन्स लिगमा स्थान बनाउन सकेन ।

वाटफर्डको मैदानमा पहिलो हाफमा ४ गोल गरेको सिटीका लागि कप्तान भिन्सेन्ट कम्पनीले गोलको खाता खोलेका थिए , सर्जियो अग्वेरोले २ गोल गरे भने ग्याब्रियल जिसस र फन्र्यान्डिन्होले समान १ गोल गरे । त्यस्तै आर्सनललाई पछि पार्दै चौथो स्थान पक्का गरेको लिभरपुलका लागि जिनी वाईन्यान्डमले पहिलो हाफको अन्त्य अघि गोल गर्दै अग्रता दिलाए । दोस्रो हाफमा ब्राजिलियन मिडफिल्डर फिलिपे कौटिन्हो र एडम लालानाले गोल गरे ।

खेलको आठौ मिनेटमा हेक्टर बेलारिनले आर्सनललाई अग्रता दिलाएका थिए । त्यसको ३ मिनेटपछि एभर्टनको जवाफी हमलालाई रोक्न प्रयासरत लौरेन्ट कोसेस्न्लीले सोझै रातो कार्ड पाएपछि आर्सनल १० खेलाडीमा सिमित रह्यो । आर्सनलका लागि स्यान्चेज र आरोन रामसेले थप गोल गरे भने लुकाकुले एभर्टनको एकमात्र गोल गरे ।

पाचौ स्थानमा सिजनको अन्त्य गरेको आर्सनलले अर्को सिजन युरोपा लिगको समूह चरणबाट प्रतिस्पर्धा गर्नेछ । आर्सने वेंगरको कार्यकालमा आर्सनलको यो सबै भन्दा खराब नतिजा हो ।

अन्तिम दिनको नतिजाहरु

आर्सनल ३-१ एभर्टन
बर्न्ली १-२ वेस्ट ह्याम
चेल्सी ५-१ सन्डरल्याण्ड
हाल १- ७ टोटेनह्याम
लेस्टर १-१ बोउर्नेमोथ
लिभरपुल ३-० मडल्सब्रो
म्यानचेस्टर युनाइटेड २-० क्रिस्टल प्यालेस
साउथह्याम्प्टन ०-१ स्टक
स्वान्सी २-१ वेस्ट ब्रोम
वाटफर्ड ०-५ म्यानचेस्टर सिटी