बार्सिलोना (एजेन्सी) – बार्सिलोनाले ला लिगाको अन्तिम खेलमा आफ्नो घरेलु मैदानमा ऐबारको सामना गर्दै छ। अंक तालिकामा ३ अंकले पछाडी रहँदै दोस्रो स्थानमा रहेको बार्सिलोनालाई उपाधि सम्भावना जीवित राख्न यो खेल जित्नै पर्ने दबाब छ ।

सिजनको अन्तिम खेल खेल्दै गर्दा बार्सिलोनालाई जितको नतिजा मात्र अपुग छ । शीर्षस्थानको रियल म्याड्रिडले मालागासँगको खेल हारेमात्र बार्साको जित उपाधी जित्न सार्थक बन्नेछ। रियलले मालागासँग कम्तिमा १ अंक मात्र जोडे पनि रियलले स्वतः २०१२ यता पहिलो पटक ला लिगाको उपाधी जित्ने छ ।

ला लिगाको अन्तिम दिनसम्म आइपुग्दा रियलको ९० अंक छ भने बार्सिलोनाले ८७ अंक जोडेको छ। बार्सिलोनाले अन्तिम खेल जित्दै रियलको हातमा अनुकुल नतिजा नआए दुवैको समान ९० अंक हुनेछ र बार्सिलोनाले ‘हेड टु हेड’ का आधारमा उपाधी जित्नेछ ।

लुइस एनरिकेको ला लिगामा बार्सिलोनाको प्रशिक्षकको रुपमा यो लिगको अन्तिम खेल हुनेछ । उनले यसअघि सिजनको अन्त्यमा आफ्नो सम्झौताको अन्त्यसँगै बार्सिलोना छाड्ने निर्णय सार्वजनिक गरेका थिए । एनरिकेको तिन वर्षीय कार्यकालमा बार्सिलोनाले हालसम्म ८ उपाधि जितेको छ भने कोपा डेल रेको फाइनलमा अर्को १ उपाधि थप्ने अवसर लुइस एनरिकेलाई छ ।

त्यस्तै पाहुना टोली ऐबारले बार्सिलोनालाई हराउदै आठौ स्थानमा सिजन अन्त्य गर्ने अवसर छ । अघिल्लो सिजन १४औँ स्थानमा अन्त्य गरेको ऐबारको इतिहासमा आठौँ स्थान ला लिगामा अहिलेसम्मको सबै भन्दा राम्रो नतिजा हुनेछ ।