एजेन्सी – स्पेनिस ला लिगा अन्तर्गत बुधबार हुने खेलमा रियल म्याड्रिडले सेल्टा भिगोको मैदानमा आफ्नो लिगको ३७औं खेल खेल्दैछ। समान अंक बोकेको बार्सिलोनालाई लिगको शीर्षस्थानमा उछिन्ने दाउमा रहेको म्याड्रिडले यस खेल जितेमा लिगको अन्तिम खेलमा बराबरीमात्र गरेपनि लिग उपाधि जित्नेछ।

गतसाता युरोपा लिगको सेमिफाइनलमा म्यानचेस्टर युनाइटेडसँग पराजित भएसँगै सेल्टाले आफ्ना महत्त्वपूर्ण खेलाडीहरुलाई लिग खेलमा विश्राम दिएको थियो। यस खेलका लागि इआगो आस्पास, जोन गुडेटि, क्लाउडियो बोभु र पिओने सिस्टोले सेल्टाको आक्रमण सम्हाल्नेछन्।

रियल म्याड्रिडले ग्यारेथ बेल र ड्यानी कार्भाजललाई चोटका कारण गुमाउने पक्का छ भने नाचो फर्नान्डेज सेभिल्लासँगको खेलमा पहेंलो कार्ड खाएसँगै यस खेलमा प्रतिबन्धित रहेका छन्। हामेस रोड्रीग्वेजले खुट्टामा लागेको सामान्य चोटका कारण प्रशिक्षणमा सहभागी भएनन्, त्यसैले उनलाई आजको खेलमा प्रशिक्षक जिदानले विश्राम दिएका छन्।

सेल्टाले ला लिगामा आफुले खेलेको पछिल्लो ५ खेल हारेको छ भने उसले घरेलु मैदानमा खेलेका पछिल्ला ३ खेलमा गोल गर्न सकेको छैन। यता रियलले आफ्नो पछिल्ला ७ मध्ये ६ खेलमा कम्तिमा ३ गोल हानेको छ।

रियल म्याड्रिडले कोपा डेल रेमा सेल्टा भिगोसंग पराजय भोग्दै प्रतियोगिताबाट बाहिरिएको थियो।

खेल नेपाली समयानुसार मध्यरातको १२:४५ बजे सुरु हुनेछ।