एजेन्सी – स्पेनिस ला लिगाको अन्तिम लिग चरणसम्म आइपुग्दा पनि उपाधिको टुंगो भने अझै लागेको छैन। बार्सिलोना अंक तालिकाको शीर्षस्थानमा रहेको छ तर समान अंक बोकेको रियल म्याड्रिडले बुधबार राती सेल्टा भिगोसंग एक खेल खेल्न बाँकी छ।

तेश्रो स्थानमा पुन: एकपटक डिएगो सिमिओनीको प्रशिक्षकत्वमा रहेको एटलेटिको म्याड्रिड रहेको छ भने चौथो स्थानमा सेभिल्ला रहेको छ। यस सिजन ला लिगाबाट ग्रानाडा, ओसासुना र स्पोर्टिङ गिहोन रेलिगेसन’न पर्दै अर्को सिजन तल्लो श्रेणीमा फुटबल खेल्ने भएका छन्।

विश्वकै चर्चित फुटबल वेबसाइट गोल डट कमले निकालेको ला लिगाको उत्कृष्ट टोलीमा भने उपाधि पछ्याइरहेको रियल म्याड्रिडका स्टार फरवार्ड एवं क्लबका सर्वाधिक गोलकर्ता क्रिस्टियानो रोनाल्डो परेनन्।

रियल म्याड्रिडका ४, बार्सिलोनाको ३, एटलेटिको म्याड्रिडको २ र सेल्टा भिगो र लास पाल्मासक १/१ गरि कुल ११ खेलाडी सम्मिलित ‘टिम अफ द सिजन’मा विश्वकै सर्वोत्कृष्ट घोषित खेलाडी क्रिस्टियानो रोनाल्डो अटाएनन्।

गोलरक्षकमा यान ओब्लाक रहेको टोलीको डिफेन्समा मार्सेलो, डिएगो गोडीन, जेरार्ड पिके र ड्यानी कार्भाजल रहेका छन्। इस्को र टोनी क्रुस सम्मिलित मिडफिल्डमा लास पाल्मासका जोनाथन भिएरा रहेका छन्। आक्रमणमा बार्सिलोनाका लिओनेल मेस्सी र लुइस सुआरेजसंगै सेल्टा भिगोका इआगो आस्पासले स्थान बनाएका छन्।