एजेन्सी – स्पेनिस ला लिगा अन्तर्गत शनिबार राती हुने खेलमा बार्सिलोनाले आफ्नो घरेलु मैदानमा भिल्लारीयालसंग भिड्दैछ। बार्सिलोना यस खेलमा जित हात पारेर म्याड्रिडमाथि दबाब कायम गर्ने सुरमा हुनेछ।

८१ अंक बोकेको बार्सिलोना अंक तालिकाको शीर्षस्थानमा रहेको छ। बराबरी अंक बोकेपनि रियल म्याड्रिडलले बार्सिलोनाको तुलनामा १ खेल कम खेलेको छ। बार्सिलोनाको प्रतिद्वन्द्वी भिल्लारीयाल भने लिगको पाँचौ स्थानमा रहेको छ।

बार्सिलोनाले लिग अन्तर्गत आफ्नो घरेलु मैदानमा खेलिएको पछिल्ला १० खेलमा जित हात परेको छ। यस्तै भिल्लारीयाल र बार्सिलोना बिचको पछिल्ला ६ खेलमध्ये सबै खेलमा बार्सिलोनानै विजयी रहेको छ। उता भिल्लारीयाल पनि आफुले लिगमा खेलेको पछिल्ला ६ मध्ये ५ खेलमा जित दर्ता गर्दै फर्ममा रहेको संकेत दिइरहेको छ।

चोटका कारण बार्सिलोनाका लागि डिफेन्डर एलेक्स भिडल र राफिन्हा खेलमा उपस्थित हुने छैनन् भने आन्द्रेस इनिएस्टाको पनि खेल्ने सम्भावना कम छ। चोटले सताइरहेको कारण इनिएस्टाले विश्राम लिन सक्ने सम्भावना बढेको छ। उनको स्थानमा आन्द्रे गोमेसले मिडफिल्डमा खेल्नेछन्।

पाहुना टोली भिल्लारीयालका लागि पछिल्लो खेलमा प्रतिबन्ध पाएका डिफेन्डर माटेओ मुसाचियो उपलब्ध हुनेछन्। गोलरक्षक सर्जियो असेन्जो, डेनिस चेरिसेभ र भिक्टर रुइज चोटका कारण खेलमा देखिनेछैनन्।

खेल नेपाली समयानुसार शनिबार राती १०:१५ बजे सुरु हुनेछ।