म्याड्रिड (एजेन्सी) – स्पेनिस ला लिगाको उपाधि जित्ने लक्ष्यलाई थप मजबुद बनाउने उद्देश्यका साथ आज घरेलु मैदानमा उत्रने रियल म्याड्रिडले भ्यालेन्सियाविरुद्ध कुनै अंक गुमाउने अपेक्षा गरेको छैन । घरेलु मैदानमा भएका अघिल्ला ५ खेलमा ७ अंक गुमाएको रियलले भ्यालेन्सियाविरुद्ध खेल्दा स्टार खेलाडी क्रिस्टियानो रोनाल्डो र टोनी क्रुसलाई पुनः मैदानमा फर्काउनेछ ।

बार्सिलोना भन्दा १ खेल कम खेलेको रियल अंक तालिकामा समान अंक रहेपनि हेड टु हेडको आधारमा दोस्रो स्थानमा छ । मुख्य फरवार्ड रोनाल्डोलाई अघिल्लो खेलमा विश्राम दिएपनि आजको खेलमा फर्कने निश्चित छ ।

बार्सिलोनासँग रातो कार्डको सामना गरेका सर्जियो रामोस १ खेलको प्रतिबन्धपछि मैदान फर्कनेछन् । ग्यारेथ बेल र पेपे भने चोटका कारण खेल्ने छैनन् ।

अर्कोतर्फ अंकतालिकाको १२ औ स्थानमा रहेको भ्यालेन्सियाले आफनै मैदानमा राम्रो प्रदर्शन गर्दै आइरहेको छ । अवे खेलमा टोलीको प्रदर्शन सन्तोषजनक छैन । यसअघिका ५ अवे खेलमा भ्यालेन्सियाले १ खेलमा जितेको थियो । बाँकी खेलमा टोलीले अंक गुमाएको थियो ।

ला लिगामा घरेलु मैदानमा रियललाई २–१ ले स्तब्ध पारेको भ्यालेसियाले रियलसँगको अहिले सम्मको १ सय ९५ भेटमा ५५ जित र ४० बराबरी गरेको छ भने १ सय खेलमा पराजय भोगेको छ ।