वीरगन्ज (हाम्रो खेलकुद)– ए डिभिजन क्लबको सहभागितमा रहेको बर्षको पहिलो नकआउट फुटबल प्रतियोगिता टुबोर्ग प्रथम विशाल स्मृति गोल्ड कप को उपाधिका लागि त्रिभुवन आर्मी क्लब र सिएमजी क्लबले शनिबार एकअर्काको सामना गर्दैछन् ।

चर्को गर्मीका बीच हुने फाइनलमा दुवै टोलीका प्रशिक्षक खेलाडीले क्षमता अनुसारको प्रदर्शन गर्नेमा भने शंका व्यक्त गर्छन् । ‘मोफसलमा प्रतियोगिता हुनु राम्रो हो । तर मौसमलाई पनि ख्याल गर्नुपर्छ’ आर्मीका प्रशिक्षक नविन न्यौपाने भने,‘यहाँ आज ४२ डिग्री थियो । भोली अझै बढ्ने अनुमान छ । यस्तोमा खेलाडीलाई खेल्न निकै कठिन हुन्छ ।’

न्यौपानेको भनाईसँग उनका समकक्षी संकटाका सल्याण खड्गी पनि सहमत छन् । ‘खेलाडीले आफ्नो तर्फबाट सक्दो प्रयास गर्लान् तर मौसमले साथ दिदैन ’ खड्गीले भने, ‘डिहाड्रेसनको समस्या हुन सक्छ । खेलाडीले एकदम थकान महसुस गर्न सक्छन् । त्यस्तोमा क्षमता अनुसारको प्रदर्शन गर्न गाह्रो पर्न सक्छ । ’ वीगरन्जको तापमान शुक्रबार ४२ डिग्री सेल्सेस सम्म पुगेको थियो भने शनिबार ४४ डिग्री सेल्सेस पुग्ने अनुमान छ ।

मौसम प्रतिकुल भएपनि दुवै टोली फाइनलका लागि भने तयार रहेका छन् । अघिल्लो बर्ष दुवै टोलीले मोसफलका नकआउट प्रतियोगितामा उच्च प्रदर्शन गरेका थिए । नयाँ बर्ष उपाधि जित्नै यात्रा सुरु गर्नेमा दुवै टोली दृढ छन् । दुवै टोलीले गत बर्ष समान ३ वटा नकआउट फुटबल प्रतियोगिताको उपाधि जितेको थियो । उनीहरुभन्दा माथि लक्ष्मी हुन्डाई मनाङ मस्र्याङ्दी मात्र रहेको थियो । मनाङले सर्वाधिक ४ वटा नकआउट उपाधि जितेको थियो ।

आर्मीले गत बर्ष ९ वटा फाइनल खेल्दा संकटाले ७ वटा फाइनल खेलेको थियो । गत बर्ष यी दुई टोलीले ३ वटा फाइनल चितवनमा विकास रनिङ सिल्ड, सिमरामा रुस्लान सिमरा गोल्ड कप र बुटवलमा तिलोत्तमा गोल्ड कप खेलेका थिए । ती तीनै फाइनल संकटाले जितेको थियो ।

आर्मीसँगको तीनै फाइनल जितेपनि संकटाका प्रशिक्षक खड्गी त्यसलाई तथ्याङ र इतिहासलाई स्मरण गर्न मात्र मिल्ने बताउँछन् । ‘हिजो हामीले त्यो सफलता प्राप्त गर्यौं । त्यसको मतबल भोली पनि जितिन्छ भन्ने होइन ’ उनले भने, ‘हरेक नयाँ प्रतियोगिता एउटा नयाँ अध्याय हो । हरेक खेलमा नयाँ इतिहास लेखिन्छ । हामी त्यसका लागि तयार छौं ।’

आर्मीका प्रशिक्षक नवीन न्यौपाने भने संकटासँगको हारको श्रृखंला रोक्न टोली सचेत रहेको बताउँछन् । ‘गत बर्ष एउटा होइन तीनवटा फाइनल हामीले संकटासँगै गुमायौं’उनी भन्छन्,‘हामी फेरी निराश भएर फर्कन चाहदैनौं । त्यसले हामी आफ्नो पुरै शक्ति मैदानमा लगाउने छौं ।’
टोलीका फरवार्ड नवयुग श्रेष्ठ चोटका कारण आराम गरिरहेका छन् । रक्षक जीतेन्द्र कार्की घुँडा सुन्निएका कारण शनिबार खेल्नेमा शंका छ । त्यसबाहेक टोलीका अन्य सदस्य भने फिट रहेकाले न्यौपाने फाइनल जित्नेमा आशावादी छन् । एसियन कप छनोट अन्तर्गत फिलिपिन्सविरुद्धको समूह चरणको तयारीका कारण फाइनलमा तिलोत्तमाको फाइनल खेल्दा कप्तान भरत खवास र विकेश कुथु आर्मी टोलीमा थिएनन् ।

अहिले उनीहरु टोलीमा फर्कदा टोलीको मनोबल उच्च रहेको प्रशिक्षक न्यौपाने बताउँछन् । अनुभवी खेलाडी हुँदा त्यसले टोलीको मनोबल अर्कै हुन्छ । गत बर्ष पुसमा हेटौडा गोल्डकप जितेयता आर्मी उपाधि विहिन रहँदै आएको छ । गत बर्ष आर्मीलाई ९ वटा नकआउटको फाइनल पुर्याएका न्यौपाने भन्छन् ‘नयाँ बर्षको पहिलो प्रतियोगिताको उपाधि जितेर यो बर्षलाई अझै सुखद बनाउनेमा हामी आशावादी छौं र त्यसका लागि तयार छौं ।’

संकटाका प्रशिक्षक खड्गी पनि टोली उपाधि उचाल्न आतुर रहेको बताउँछन् । ‘तयारी राम्रो छ । खेलाडीको मनोबल पनि बलियो छ ’ गत बर्ष संकटालाई ७ वटा नकआउटको फाइनल पुर्याएका उनले थपे, ‘हाम्रा खेलाडी बर्षको पहिलो उपाधि उचाल्न आतुर छन् । ’ उनी आर्मीलाई पछिल्लो प्रतियोगितामा भन्दा अझै बलियो अवस्थामा रहेको मान्छन् ।

‘आर्मी एकदमै बलियो टोली हो । अहिले उच्च फर्ममा पनि छ ’ उनले भने, ‘त्यसैले पनि हामीलाई हल्का रुपमा लिने गल्ति हामी गर्ने छैनौं ।’ संकटाका राष्ट्रिय टोलीका विक्रम लामा, विशाल श्रेष्ठको साथ रहेको छ । उनीहरु समावेश हुनाले टोलीका अन्य सदस्य थप उत्साहित रहेको खड्कीले बताए ।

आठ टोलीको सहभागिता रहेको प्रतियोगितामा दुई विभागिय टोली नेपाल एपिएफ र नेपाल पुलिसलाई हराउँदै संकटा फाइनलमा पुगेको थियो । त्यस्तै हिमालयन शेर्पा तथा नव जनजागृतिको चुनौतिलाई पार गराउँदै आर्मी उपाधि नजिक पुगेको थियो ।
विशाल स्मृति प्रतिष्ठानले आयोजना गरेको प्रतियोगिताको विजेताले उपाधिसहित ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ ।