म्यानचेस्टर (एजेन्सी)– इङ्लिस प्रिमियर लिगमा म्यानचेस्टरका दुई क्लब सिटी र युनाइटेड आज राती आमने सामने हुँदैछन् । सिटीको घरेलु मैदानमा हुने खेल नेपाली समय अनुसार राती १२ः४५ बजे सुरु हुनेछ ।

अंक तालिकामा १ अंकले मात्र भिन्न यी दुइ टोलीलाई अर्को सिजन च्याम्पियन्स लिगमा स्थान बनाउन यो खेल निकै महत्वपूर्ण रहनेछ । चौथो स्थानमा रहेको सिटीको ३२ खेलमा ६४ अंक छ भने ६३ अंक सहित युनाइटेड पाँचौ स्थानमा छ ।

पाहुना टोली युनाइटेडलाई डर्बी खेलमा दुई महत्वपूर्ण खेलाडीको साथ रहने छैन । युनाइटेडका लागि जारी सिजनमा उच्च गोल गरेका ज्लाटन इब्राहिमोभिच घुडाँको चोट कारण लामो समयसम्म मैदान बाहिर रहनेछन् । त्यस्तै टोलीका महंगा खेलाडी पौल पोग्बा पनि चोटका कारण उपलब्ध हुने छैनन् ।

अर्कोतिर सिटीका गुनडोगन पनि घुँडाको चोटका कारण मैदानमा उत्रने छैनन् । टोलीका महत्वपूर्ण खेलाडी डेभिड सिल्भा , सर्जियो अग्वेरो , ग्याबरिएल जिसस, जोन स्टोन्स र बाकारी साग्ना पनि खेल्ने नखेल्ने निश्चत छैन ।

आर्सनलसँग पराजित हुँदै एफए कपबाट बाहिरिएपछि सिटी पहिलो पटक युनाटेडसँग भिड्दैछ । यो सिजन युनाइटेडसँगको दुइ भेटमा सिटीले एउटा खेलमा जित र अर्कोमा हार बेहोरेको थियो । प्रिमियर लिगमा युनाइटेडलाई उसकै मैदानमा हराएको सिटी लिग कपमा भने युनाइटेडसँग पराजित भएको थियो ।