एजेन्सी – स्पेनिस ला लिगा अन्तर्गत बुधबार राती हुने खेलमा बार्सिलोनाले आफ्नो घरेलु मैदानमा ओसासुनासंग भिड्दैछ। आइतबार भएको एल क्लासिकोमा जित हात पारेर शीर्षस्थान कब्जा गरेको बार्सिलोना यस खेलमा जित हात पारेर म्याड्रिडमाथि दबाब कायम गर्ने सुरमा हुनेछ।

७५ अंक बोकेको बार्सिलोना गोलअन्तरको आधारमा शीर्षस्थानमा रहेको छ। बराबरी अंक बोकेपनि रियल म्याड्रिडलले बार्सिलोनाको तुलनामा १ खेल कम खेलेको छ। बार्सिलोनाको प्रतिद्वन्द्वी ओससुना भने लिगको २०औं स्थानमा रहेको छ।

बार्सिलोनाका लागि यस खेलमा प्रतिबन्ध झेलिरहेका स्टार फरवार्ड नेयमार अनुपस्थित रहनेछन्। यो उनले पाएको ३ खेल प्रतिबन्धको अन्तिम खेल हो। उनको स्थानमा पाको अल्कासेरले नै लिओनेल मेस्सी र लुइस सुआरेजको साथ दिनेछन। चोटका कारण एलेक्स भिदाल र राफिन्हा खेलको लागि उपलब्ध हुने छैनन्।

प्रशिक्षक लुइस एन्रिकेले स्यामुएल उम्टिटीलाई विश्राम दिएर मासेरानोलाई मैदानमा उतार्न सक्नेछन्। यस्तै आन्द्रेस इनिएस्टाको ठाउँमा पनि आन्द्रे गोमेसखेल्ने सम्भावना बढी छ।

बार्सिलोनाले आफ्नो घरेलु मैदानमा खेलिएको पछिल्लो ९ लिग खेल जितेको छ। उसले ओससुनाविरुद्ध घरेलु मैदानमा खेलेको पछिल्लो ४ खेलमा प्रत्यकमा कम्तिमा ४ गोल हानेको छ। उता ओससुनालले भने आफुले खेलेको पछिल्ला २५ खेलमध्य २ ओटामा मात्र जित हात पारेको छ।