राकेश तिमल्सिना

चितवन – साविक विजेता नारायणगढ फुटबल क्लब (एनएफसी) र भरतपुर फुटबल क्लब (बिएफसी) नारायणगढको क्याम्पाचौरमा जारी चितवन जिल्ला लिग फुटबल प्रतियोगिताको सेमिफाइनलमा पुगेका छन् ।

बिएफसीले मंगलबारको खेलमा युनिक फुटबल क्लबलाई सडन डेथमा ७–६ ले तथा एनएफसीले टाँडी युनाइटेडलाई टाइब्रेकरमा ४–२ ले हराउँदै अन्तिम चारको यात्रा तय गरेका थिए ।

बिएफसी र युनिकबीच निर्धारित ७० मिनेटको खेल २–२ को बराबरीमा टुंगिएको थियो । २९ औ मिनेटमा सुनिल श्रेष्ठले गोल गर्दै बिएफसीलाई अग्रता दिलाएको एक मिनेट वित्न नपाउँदै सन्देश गुरुङले बराबरी गोल फर्काए । दोश्रो हाफको १५ औ मिनेटमा युनिकका लागि विजय भुजेलले गोल गरे ।

तर त्यो अग्रता पनि लामो समय टिकेन । युनिकले अग्रता लिएको दुई मिनेटमै बिएफसीका जित मगरले बराबरी गोल गरेपछि खेल टाइब्रेकरतर्फ धकेलिएको थियो । टाइब्रेकरमा पनि ५–५ को बराबरीभएपछि सडन डेथमा बिएफसीले बाजी मार्यो । बिएफसीले बिहीबार सेमिफाइनलमा एभरेष्ट फुटबल क्लबको सामना गर्नेछ ।

एनएफसी र टाँडीबीचको खेलको निर्धारित समय गोल रहित बराबरीमा टुंगिएको थियो । एनएफसीका अजय थापा मगर, पुकार आले, विमल तामाङ र शेखर उप्रतीले गोल गरे भने सन्तोष गुरुङको प्रहार विपक्षी गोलकिपरले रोके । टाँडीका लागि मनिष गोले र रुमेश बर्तौला गोल गर्न सफल भए ।

सुदर्शन चौधरी र धु्रव बर्तौलाको प्रहार विपक्षी गोलकिपरले रोके । एनएफसीले बुधबार मुग्लिङबजार फुटबल क्लबसँग सेमिफाइनलमा प्रतिस्पर्धा गर्नेछ । चितवन जिल्ला फुटबल संघले आयोजना गरेको जिल्ला लिग बैशाख १६ गते सम्म चल्नेछ ।