म्यानचेस्टर (एजेन्सी) – यसै सिजनको सुरुवातमा म्यानचेस्टर सिटीको मुख्य प्रशिक्षकको जिम्मेवारी लिएका स्पेनिस प्रशिक्षक पेप गुआर्डीओला आफ्नो करियरमै पहिलोपटक उपाधिविहीन हुने भएका छन्।

आइतबार भएको एफ.ए. कपको सेमिफाइनलमा आर्सनलसंग २-१को पराजय भोगेसंगै सिटीको यस सिजन उपाधि जित्ने सम्भावना सकिएको हो। लिग कप र च्याम्पियन्स लिगमा आफ्नो यात्रा यसअघि नै टुंग्याइसकेको सिटी प्रिमिएर लिगमा चौथो स्थानमा रहेको छ। ३२ खेल खेल्दै ६४ अंक बोकेको सिटि शीर्षस्थानमा रहेको चेल्सीभन्दा ११ अंकले पछाडी रहेको छ। चेल्सीको तुलनात्मक रुपमा सजिलो खेलहरु रहेको र फर्ममा रहेका कारण उसको पोल्टाबाट सिटीले उपाधि खोस्न अविश्वसनिय नतिजा आउनुपर्ने हुन्छ।

सन् २००८मा बार्सिलोनाको मुख्य प्रशिक्षकको जिम्मा पाएका गुआर्डीओलाले आफ्नो पहिलो ३ सिजनमा ३ लिग उपाधि जित्दै तहल्का मच्चाएका थिए। आफ्नो पहिलो सिजनमा ६ उपाधि भित्र्याएका गुआर्डीओलाले बार्सिलोनासंग रहेर ३ ला लिगा, २ कोपा डेल रे, ३ स्पेनिस सुपर कप, २ च्याम्पियन्स लिग, २ यूएफा सुपर कप  र २ क्लब विश्व कप जितेका थिए।

सन् २०१३मा बायर्न म्युनिख पुगेका गुआर्डीओलाले त्यहाँ रहेको ३ सिजननै घरेलु लिगको उपाधि जितेका थिए। ३ मध्ये २ सिजनमा लिग कपको उपाधि जिताएका उनले यूएफा सुपर कप र क्लब विश्वकप उपाधि पनि आफ्नो पोल्टामा पारे।

म्यानचेस्टर सिटिमा ३ वर्षे अनुबन्धन गरेका गुआर्डीओलाले सिजनको सुरुवात देखिनै उपाधि जित्न नसके आफु क्लबमा रहेको औचित्य नरहने बताएका थिए। तर, उनको भविष्यको बारेमा हालसम्म केहि नयाँ खबर भने क्लबले दिएको छैन।