लिभरपुल (एजेन्सी)– क्रिस्टियन बेन्टेकेको २ गोलको मद्दतमा क्रिस्टल प्यालेन्सले आइतबार प्रिमियर लिगमा लिभरपुललाई २–१ ले हराएको छ । घरेलु मैदानमा लिएको अग्रतालाई लिभरपुलले जोगाउन सकेन ।

२४ औं मिनेटमा फिलिप्पे काउटिन्होले फ्रिकिकमार्फत उत्कृष्ट गोल गर्दै लिभरपुललाई अग्रता दिलाएका थिए । तर, क्रिस्टल प्यालेस हार मान्ने पक्षमा थिएन ।

पहिलो हाफको केही मिनेटअघि बेन्टेकेले याहान काबायेको क्रसमा बराबरी गोल गर्दैै टोलीलाई खेलमा फर्काएका थिए । ७४ औं मिनेटमा बेन्टेकेले अर्को गोल थप्दै टोलीलाई पछिल्ला ८ खेलमा छैटौं जित दिलाए । एन्ड्रोस टाउनसेन्डको कर्नर आएको बललाई लिभरपुलका खेलाडीले क्लियर गर्न नसकेपछि त्यहि बलमा बेन्टेकेले निर्णायक गोल गरेका थिए ।

जितपछि प्यालेस ३८ अंकका साथ १२ औं स्थानमा छ । रेलिगेसन क्षेत्रमा रहेको टोलीको भन्दा लिभरपुलको ७ अंक बढी छ । प्रिमियर लिगमा चेल्सी (७५) शीर्षस्थान, टोनेनह्याम (७१) दोस्रो र लिभरपुल (६६) तेस्रो स्थानमा छ ।

शीर्ष ५ मा रहेका टोलीमध्ये लिभरपुलले ३४ खेल खेलिसक्दा अन्य ४ टोलीले ३२ खेल मात्र खेलेका छन् । लिभरपुलको भन्दा चौथो स्थानमा रहेको म्यानचेस्टर सिटीको २ अंक र पाँचौं स्थानमा रहेको म्यानचेस्टर युनाइटेडको ३ अंक कम छ । प्रिमियर लिगमा आइतबार नै अर्को खेलमा युनाइटेडले बनर्लीलाई २–० ले हराएको थियो ।