न्योन (एजेन्सी) – बार्सिलोना फुटबल क्लब र रियल म्याड्रिडका युवा टोली सेमिफाइनलको पराजय पछि यूइएफए युथ लिगबाट बाहिरिएका छन्। बार्सिलोनालाई हराउदै अष्ट्रीयाको साल्जबर्ग र रियललाई हराउँदै पोर्चुगलको बेन्फिकाको युवा टोली युवाहरुको च्याम्पियन्स लिग मानिने युथ लिगको फाइनल प्रवेश गरेका छन्।

बार्सिलोना १-२ स्लाजबर्ग

शुक्रबार भएको पहिलो खेलमा बार्सिलोनाको अग्रतालाई उल्टाउँदै साल्जबर्गले २-१ को विजयी नतिजा निकालेको हो । स्विट्जरल्याण्डको न्योन स्थित कोलोभरे स्पोर्ट्स सेन्टरमा भएको पहिलो सेमिफाइनल खेलमा जोर्डी एम्बौलाको १९औं मिनेटको गोलमा बार्सिलोनाले अग्रता लिएको थियो । बार्सिलोनाको पहिलो हाफको अग्रतालाई दोस्रो हाफमा हानेस वुल्फले ६३औं  मिनेटमा गोल गर्दै बराबरीमा पुर्याएका थिए । वुल्फले यस प्रतियोगिताको ६ खेलमा ७ गोल गरिसकेका छन् । वुल्फको गोलमा खेलमा फर्किएको साल्जबर्गकालागि दोस्रो हाफमा मैदान प्रवेश गरेका डाका प्याट्सनले विजयी गोल गरेका थिए । प्याट्सनको यो प्रतियोगिताको पहिलो खेल थियो ।

रियल २-४ बेन्फिका

कोलोभरे स्पोर्ट्स सेन्टरमा शुक्रबार भएको दोस्रो सेमिफाइनलमा बेन्फिकाले रियल म्याड्रिडलाई ४-२ ले हराउदै फाइनलको यात्रा तय गरेको थियो । पहिलो हाफको १९ मिनेट भित्र ३ गोल गरेको बेन्फिकाले खेल आफ्नो पक्षमा पारेको थियो । जो फेलिक्सले खेल सुरु भएको पाँचौ मिनेटमा गोल गर्दै बेन्फिकालाई अग्रता दिलाएका थिए भने जो फिलिपेले १७औं मिनेटमा बेन्फिकाको अग्रता दोब्बर गरे । फिलिक्सको १९औं मिनेटको गोलले बेन्फिका ३-० को बलियो स्तिथिमा पुग्यो । रियलका लागि डानी गोमेजले गोल गर्दै पहिलो हाफमा रियलको आशा कायमै राखे।

पहिलो हाफमा ३-१ को स्थितिमा रहेको रियलका लागि जेमी सियोनीले ५५औं मिनेटमा गोल गर्दै खेलमा पुनरागमनको सम्भावना देखाए तर म्याड्रिडले बराबरी गोल गर्न नसक्दा फिलिपेले निर्धारित समयको अन्त्यपछिको इन्जुरी समयमा आफ्नो व्यक्तिगत दोस्रो गोल गर्दै बेन्फिकाको ४-२ को जित सुनिश्चित गरे ।