दिपक बोहोरा

फिदिम – विर्ता युनाइटेड झापा पाँचथरमा जारी प्रथम पाँचथर गोल्डकप प्रतियोगिताको अन्तिम दुईमा प्रवेश गरेको छ। चार महिनाको अवधिमा बिर्ता युनाइटेड झापा फिदिममा दोश्रो उपाधि नजिक पुगेको हो।

फिदिम माविको मैदानमा बिहिबार भएको प्रतिस्पर्धात्मक खेलमा रेडहर्स इलामलाई २–१ गोलको अन्तरले पराजित गर्दै विर्ता युनाइटेड झापा फाइनल प्रवेश गर्दै एपिएफ पुर्वाञ्चल संगको भेट पक्का गरेको छ । बिर्ताको जितमा योगेश गुरुङ र बिशाल राईले एक एक गोल गरे । खेलको नवौं  मिनेटमा बिर्ताका योगेश गुरुङको लामो प्रहार गोलमा परिणत भएपछि खेलमा बिर्ताले अग्रता लिएको थियो। तर, बिर्ताको अग्रता धेरै बेर टिक्न सकेन। खेलको १७औं मिनेटमा रेडहर्सका मनिष थापाले गोल गर्दै खेललाई बराबरीमा पुर्याएका थिए । मनीषले वन भर्सेज वनमा सुन्दर गोल गरेका थिए। खेलको ७७औं मिनेटमा बुद्ध चेम्जोङको प्रहार इलामका रक्षकले क्लियर गर्न नसक्दा फर्केर आएको बलमा झापाका बिशाल राइले गोल गरेका थिए।

निकै प्रतिस्पर्धात्मक खेलमा दुवै टिम निकै आक्रमक खेल प्रदर्शन गरेका थिए। खेलको ७८औं मिनेटमा वन भर्सेज वनको स्थितीमा झापाका बिशाल राई गोल गर्न चुकेका थिए। पहिलो हाफमा राम्रो खेल प्रर्दशन गरेको झापालाइ दोश्रो हाफमा इलामले केहि दबाबमा राखेको थियो । इलामले आफ्नो पहिलो खेलमा डिएफसि मोरङलाइ हराएको थियो भने झपाले मिसन युनाइटेड ताप्लेजुङलाइ पराजित गरेको थियो।

आजको खेलको म्यान अफ दि म्याच रेडहर्स इलामका छिरिङ गुरुङ भए। उनले नगद २००० प्राप्त गरे। बिर्ता युनाइटेडले फाइनलमा शनिबार पुर्वाञ्चल एपिएफको सामना गर्नेछ।

खेल पछि हाम्रो खेलकुद संग कुरा गर्दै झापाका टिम व्यवस्थापक टेकराज सुब्बाले आफ्नो टिमले राम्रो खेल्दा खेल्दै पनि स्कोरीङ गर्न चुकेको बताए। उनले फाइनलमा यस्तो गल्ती दोहरीन नदिने बताए। रेडहर्सका टिम व्यवस्थापक सेवक देवानले पाएका अवसर गुमाउँदा खेल हार्न परेको बताए। बिर्ता युनाइटेड झापा पुसमा फिदिममा सम्पन्न भएको आठौँ फाल्गुनन्द गोल्डकपको विजेता समेत हो ।