दिपक बोहोरा

फिदिम– एपिएफ पूर्वाञ्चल प्रथम पाँचथर गोल्ड कप प्रतियोगिताको फाइलनमा पुगेको छ । पथरी स्पोर्टिङ क्लब युनाइटेडमाथि बुधबार सेमिफाइनलमा ३–० को एकपक्षिय नतिजा निकाल्दै एपिएफ उपाधि नजिक पुगेको हो । एपिएफले रेडहर्स इलाम र विर्ता युनाइटेड झापाबीचको विजेतासँग फाइनल खेल्नेछ ।

फिदिम माविको मैदानमा एपिएफलाई जित दिलाउन बुद्धिमान राई , सुशिल राई र झलक गुरुङले गोल गरेका थिए । तेस्रो मिनेटमा बुद्धिमानले लामो प्रहारमा गोल गर्दै अग्रता दिलाएको एपिएफका लागि १२ औं मिनेटमा सुशिलले गोल थपेका थिए । बुद्धिमानको प्रहारलाई विपक्षी गोलकपरले नियन्त्रणमा लिन नसकेपछि त्यहि रिबाउन्डमा सुशिलले गोल गरेका थिए । ७१ औं मिनेटमा झलकले गोल थपेपछि एपिएफको जित सहज बनेको थियो । पथरीका रक्षकले क्लियर गर्न नसकेको बलमा झलकले गोल गरेका थिए । बुद्धिमान खेलको म्यान अफ दी म्याच बनेर उनले २ हजार रुपैयाँ प्राप्त गरे ।

एपिएफका प्रशिक्षक बलबहादुर गुरुङले सोचे भन्दा राम्रो प्रदर्शन गरेको बताए । उनले फाइनलमा सेमिफाइनलका गल्तिमा सुधार गर्ने पनि जनाए । पथरीका प्रशिक्षक दिपक पुलामीले भने खेलाडीहरुले सोचे अनुरुप खेल्न नसकेको बताए ।

पाँचथर गोल्ड कपको दोस्रो सेमिफाइनल बुधबार: रेडहर्स इलाम र विर्ता युनाइटेड झापा