म्याड्रिड(एजेन्सी) – युरोपेली च्याम्पीयन्स लिग अन्तर्गत मंगलबार राती भएको खेलमा विजयी हुँदै घरेलु टोली रियल म्याड्रिड सेमीफाइनलमा प्रवेश गरेको छ। पहिलो लेगमा २-१को जित दर्ता गरेको म्याड्रिडले मंगलबारको खेलमा बायर्नले पुनरागमन गर्दै अतिरिक्त समयतर्फ तानेपछि अतिरिक्त संयको ३ गोलको मद्दतले जित दर्ता गरेको थियो।

निर्धारीत समयको खेल २-१मा बायर्नको पक्षमा रहेपछि खेलमा ३० मिनेटको अतिरिक्त समय खेलिएको थियो। खेलको ५३औं मिनेटमा बायर्नले पेनाल्टीमार्फत गोल गर्दै पाहुना टोलीलाई अग्रता दिलाएका थिए। क्यासेमिरोले रोबेनलाई बक्सभित्र लडाएपछि बायर्नले पेनाल्टी पाएको थियो। लेवान्डोस्कीले पेनाल्टीमा कुनै गल्ती नगरेपछि बायर्नको आशा जागेको थियो। तर, ७६औं मिनेटमा क्यासेमिरोको क्रसमा हेडरमार्फत उत्कृष्ट गोल गर्दै क्रिस्टियानो रोनाल्डोले म्याड्रिडलाई खेलमा पुन फर्काए।

1. खेल बराबरीमा आएको २ मिनेट नबित्दै सर्जियो रामोसले आत्मघाती गोल गरेपछि बायर्न खेलमा अघि बढ्यो। डिफेन्स र गोलरक्षकको तालमेल नमिल्दा भएको हास्यास्पद गोलले खेललाई समग्रमा बराबरीमा ल्याएको थियो। निर्धारीत समयको ५ मिनेट खेल बाँकी हुँदा आर्टुरो भिडाल दोहोरो पहेंलो कार्ड खाँदै मैदानबाट बाहिरिएका थिए।

१० खेलाडीमा सिमित बायर्नले अतिरिक्त समयमा ३ गोल खाएपछि समग्रमा ६-३को हार व्यहोर्दै प्रतियोगिताबाट बाहिरियो। क्रिस्टियानो रोनाल्डोले १०५औं मिनेटमा सर्जियो रामोसको पासलाई सदुपयोग गर्दै म्याड्रिडलाई अग्रता दिलाएका थिए भने त्यसको पाँच मिनेटपछि मार्सेलोको पासमा अर्को गोल गर्दै खेलमा ह्याट्रिक पुरा गरे। मार्को एसेन्सियोले ११२औं मिनेटमा गोल गर्दै प्रतियोगिताको सेमिफाइनलमा रियलको नाम सुनिश्चित पारेका थिए।