दिपक बोहोरा

फिदिम – बिर्ता युनाइटेड झापा पाँचथरमा जारी प्रथम पाँचथर गोल्डकप प्रतियोगिताको सेमिफाइनलमा प्रवेश गरेको छ।

फिदिम मा.बिको मैदानमा मंगलबार भएको खेलमा मिसन युनाइटेड ताप्लेजुङलाइ ५–१ को फराकिलो गोल अन्तरले पराजित गर्दै बिर्ता युनाइटेड झापा अन्तिम चारमा प्रवेश गरेको हो। बिर्ताको जितमा राष्ट्रिय टिमका मिडफिल्डर विशाल राईले ह्याट्रिक गरेका थिए। विशालको ह्याट्रिक सहित निशान खड्का र बुद्ध चेम्जोङले एक एक गोल गरेका थिए।

खेलको १२ औं मिनेटमा बिर्ता युनाइटेडका बिशाल राइ ‘बि’ले गोल गर्दै बिर्तालाई अग्रता दिलाएका थिए। ताप्लेजुङका डिफेन्सले बललाई पुर्णरुपमा क्लियर गर्न नसक्दा बिशालले गोल गरेका थिए। दोश्रो हाफको ५३अ‍ौं मिनेटमा बिशालले पुन: गोल गर्दै झापाको अग्रता दोब्बर पारे।

५८औं मिनेटमा झापाका निशान खड्काले फ्रिकिक बाट सुन्दर गोल गरेका थिए । ६८अौं मिनेटमा बिशाल राई गोल गर्दै ह्याटिक पुरा गरे । बिशालको प्रहार गोलरक्षकले नियन्त्रणमा लिन खोज्दा गुमेपछि गोल भएको थियो । खेलको इन्जुरी समयमा झापाका बुद्ध चेम्जोङले गोल गर्दै बिर्तालाइ सेमिफाइनल पुर्याएका थिए । खेलको ६६औं मिनेटमा मिसन युनाइटेडका मन्जित लिम्बुले सान्तवना गोल फर्काएका थिए । ह्याट्रिक गरेका बिशाल राइ खेदको म्यान अफ दि म्याच बने। उनले नगद २००० प्राप्त गरे ।

खेलपछि हाम्रोखेलकुदसंग कुरा गर्दै आफु भन्दा कमजोर प्रतिद्वन्द्वी भएकाले जित सहज भएको बिर्ता युनाइटेडका टिम व्यवस्थापक टेकराज सुब्बले बताए। ताप्लेजुङका प्रशिक्षक प्रकाश लिम्बुले आफ्नो टिम मनोवैज्ञानीक रुपमा पुर्ण तयार नहुँदा पराजित हुन परेको बताए। बिर्ता युनाइटेड पुषमा फिदिममा सम्पन्न भएको आठौं फाल्गुनन्द गोल्डकपको बिजेता समेत हो ।

आजको खेल संगै पाँचथर गोल्डकपको पहिलो चरणका सबै खेल सकिएका छन्। रेडहर्स इलाम , पथरी स्पोर्टिङ क्लब र एपिएफ पुर्वाञ्चल यसअघि नै सेमिफाइनल प्रवेश गरीसकेका छन्। बिर्ता युनाइटेडले फाइनल प्रवेशको लागि बिहिबार रेडहर्स इलामको सामना गर्ने छ।

पाँचथर गोल्डकपमा बुधबारको पहिलो सेमिफाइनल खेल
पथरी स्पोर्टिङ क्लब र एपिएफ पुर्वाञ्चल