मड्रीड (एजेन्सी) – युरोपेली च्याम्पियन्स लिग अन्तर्गत मंगलबार बायर्न म्युनिख र रियल म्याड्रिडबीच क्वार्टरफाइनल चरणको दोश्रो लेगको खेल हुँदैछ। पहिलो लेगमा २-१को महत्वपूर्ण अवे जित हासिल गरेको रियल यहाँ सुखद नतिजा निकाल्दै सेमिफाइनल पुग्ने दाउमा हुनेछ भने बायर्न खेलको नतिजा उल्टाउने प्रयासमा उत्रनेछ।

पहिलो लेगमा २ गोल गरेका क्रिस्टियानो रोनाल्डोले रियल म्याड्रिडको लिग अन्तर्गतको खेलमा विश्राम गरेका थिए। उनीसंगै प्रशिक्षक जिदानले मुख्य खेलाडीहरुलाई स्पोर्टिंगसंगको खेलमा मैदानमा उतारेका थिएनन्। चोटका कारण ग्यारेथ बेल उपस्थित हुन नसक्ने पक्का भएको छ र उनको ठाउँमा इस्कोले मौका पाउन सक्नेछन्। इस्कोले उत्कृष्ट प्रदर्शन गर्दै स्पोर्टिंगसंगको खेलमा म्याड्रिडलाई जित दिलाएका थिए। म्याड्रिका लागि डिफेन्डरद्वय राफेल भारान र पेपे चोटका कारण विश्राममा छन्।

उता बायर्नको लागि पनि डिफेन्डरहरुको चोट टाउको दुखाइको विषय बनेको छ। नियमित डिफेन्डर म्याट्स हमल्स चोटका कारण खेल्न नसक्ने हुँदा हाभी मार्टीनेज प्रतिबन्धका कारण खेल्न पाउने छैनन्। काँधको चोटका कारण पहिलो लेग गुमाएका फरवार्ड रोबर्ट लेवान्डोस्की भने खेल्न सक्ने सम्भावना बढेको छ।

म्याड्रिड र बायर्नबिचको पछिल्लो ६ खेलमा म्याड्रिडले ५ खेलमा जित हासिल गरेको छ। म्याड्रिडले च्याम्पियन्स लिगमा आफ्नो पछिल्लो १३ खेलमा हार व्येहोरेको छैन।