बार्सिलोना (एजेन्सी) – स्पेनिस ला लिग अन्तर्गत शनिबार राती भएको खेलमा बार्सिलोनाले रियल सोसिडाडलाई ३-२ले पराजित गरेको छ

खेलको १७औं मिनेटमा लियोनेल मेस्सीको गोलले अग्रता लिएको थियो। मेस्सीले पोष्टभन्दा करिब २५ यार्ड बाहिरबाट गरेको प्रहार सिधै गोलना परिणत भएको थियो। बार्सिलोनाले पुन: मेस्सीकै गोलमा अग्रता दोब्बर परेको थियो। मेस्सीले ३७औं मिनेटमा गोल गर्दै बार्सिलोनालाई २-०को अग्रता दिलाएका थिए। लुइस सुआरेजको सुरुवाती प्रहारलाई गोलरक्षकले फर्काएको बलमा मेस्सीले सहजे गोल गरेका थिए।

खेलको ४२औं मिनेटमा बार्साका डिफेन्डर स्यामुएल उम्टिटीले आफ्नै पोष्टमा गोल गरेपछि सोसिडाड खेलमा फर्किएको थियो।  तर, त्यसको २ मिनेट नबित्दै नेयमारको प्रतिबन्धका कारण सुरुवाती एघारमा स्थान पाएका फ्रानसिस्को अल्कासेरले गोल गर्दै बार्सिलोनाको २ गोलको अग्रता पुन: कायम गरे। उनले मेस्सीको पासलाई सदुपयोग गर्दै गोल गरेका थिए।

पहिलो हाफको इन्ज्युरी समयको दोश्रो मिनेटमा सोसीडाडले फेरी अग्रता घटायो। विलियन जोसेको क्रसमा जबिएर प्रिएटोले भलीमार्फत गोल गर्दै खेललाई ३-२को स्थितिमा ल्यायो। खेलको दोश्रो हाफमा थप गोल हुन नसकेपछि बर्सिलिना विजयी भएको थियो।

जितसंगै बार्सिलोना ३२ खेलमा ७२ अंक जोडेर अंक तालिकाको दोश्रो स्थानमा रहेको छ। शीर्षस्थानमा रहेकोरियल म्याड्रिडको ३१ खेलमा ७५ अंक छ।