काठमाडौं (हाम्रो खेलकुद) – रेड आर्मीले सपोर्टस लिग नेपालको उपाधि जितेको छ । सानेपास्थित फिल्ड फुटसबलमा रियल मड्रिडलाई सडन डेथमा ५–४ ले हराउँदै रेड आर्मीले उपाधि जितेको हो । निर्धारित सयम ५० मिनेटको खेल २–२ को बराबरीमा टुंगिएको थियो । प्रतियोगिताको मुख्य प्रायोजन न्युरोडको जर्सी पसलले गरेको थियो।

प्रतिस्पर्धात्मक फाइनलमा रेड आर्मीका सुरज कार्कीले खेलको दोस्रो मिनेटमा गोल गर्दै अग्रता दिलाएका थिए । विपक्षी सम्हालिन नपाई राहुल खड्काले १२ औं मिनेटमा दर्शनिय गोल गर्दै रेड आर्मीका लागि गोल अन्तर दोब्बर पारे ।

दुई गोलले पछि परेरपनि रियलले दोस्रो हाफमा खेल बराबरीमा पुर्याएको थियो । सुनिल तामाङले २७ औ मिनेट र आकाश लामाले ४० औ मिनेट गोल गर्दै टोलीलाई खेलमा फर्काएका थिए । सडन डेडमा म्यानचेस्टरको रेड आर्मीले बाजी मारेको थियो ।
सन्दीप कार्की प्रतियोगिताको उत्कृष्ट खेलाडी घोषित भने राहुल खड्का उच्च गोलकर्ता बने । जर्सी पसलका प्रमुख कार्यकारी अधिकृत कृष्ण गुप्ताले उनीहरुलाई ट्रफी हस्तान्तर गरे ।  विजेता खेलाडीलाई अखिल नेपाल फुटबल संघ (एन्फा) का सहायक महासचिव सञ्जिव मिश्रले पुरस्कृत गरे । मिश्रले फुटसलले फुटबल विकास र प्रबर्दनमा सहयोग पुगेको बताए ।

रेड आर्मीका विकास भण्डारीले उपाधिले थप हौसाला मिलेको र यस्ता प्रतियोगिताले खेलाडीहरुको मनोबल उच्च हुने बताए । चार महिनासम्म संचालित प्रतियोगितामा ८ सपोट्र्स क्लब चेल्सी नेपाल, स्पर्स नेपाल, बार्सा नेपाल, सिटिजन्स नेपाल, आर्सनल नेपाल, लिड्स नेपाल, रियल मड्रिड फ्यान क्लब अफ नेपाल र रेड आर्र्मीको सहभागिता थियो ।