एजेन्सी – युरोपेली च्याम्पियन्स लिग अन्तर्गत क्वार्टरफाइनल चरणको खेलको पहिलो लेगमा युभेन्टसले बार्सिलोनालाई आफ्नो घरेलु मैदानमा निम्त्याउँदै छ।

घरेलु लिगमा किएभोसंगको २-०को जितमा आफ्नो महत्वपूर्ण खेलाडीहरुलाई विश्राम दिएका प्रशिक्षक मासिमिलानो एलेग्रीले यस खेलका लागि आफ्नो उत्कृष्ट ११ लाई मैदानमा उतार्ने पक्का छ। लिओनार्डो बोनुची, जिओर्गियो किएलिनी, मारियो मान्जुकिच र मिरालेम प्यानिचले लिगको खेलमा विश्राम लिएका थिए।

युभेन्टसका लागि ड्यानी आल्भेसले पहिलोपटक आफ्नो पुर्व क्लब बार्सिलोनाको सामना गर्दैछन्। चोटका कारण मार्को पाका उपलब्ध हुने छैनन् भने वान क्वाड्राडो पहेंलो कार्ड पाएमा अर्को खेल खेल्न बाट प्रतिबन्धित हुनेछन्।

यसैगरी बार्सिलोनाका मिडफिल्डर सर्जियो बुस्केट्स पी.एस.जी संगको खेलमा जारी प्रतियोगिताको दोश्रो कार्ड खाएका कारण पहिलो लेग खेल्नबाट बन्चित भएका छन्। यद्दपी उनि क्याम्प नउमा हुने दोश्रो लेगक लागि उपलब्ध हुनेछन। पिके, नेयमार र राकिटिच भने पहेंलो कार्ड पाएको खण्डमा दोश्रो लेगमा प्रतिबन्धित हुन सक्नेछन्।

बार्सिलोनाका लागि एलेक्स भिडाल र राफिन्हा चोटका कारण यस सिजनको अन्त्यसम्मै उपलब्ध छैनन् भने आर्डा टूरान सानो चोटका कारण विश्राममा बस्ने सम्भावना रहेको छ।

युभेन्टस र बार्सिलोनाले २०१५को च्याम्पियन्स लिगको फाइनल खेलेका थिए। बर्लिनमा भएको उक्त फाइनलमा बार्सिलोना ३-१ले विजयी भएको थियो।

बार्सिलोना र युभेन्टसबिचको खेल नेपाली समयानुसार बुधबार बिहान १२:३० बजे (मंगलबार मध्यरातमा) सुरु हुनेछ।