एजेन्सी – स्पेनिस ला लिगा अन्तर्गत शनिबार भएको मालागा र बार्सिलोनाबिचको खेलमा रातो कार्ड पाएका ब्रजिलिएन फरवार्ड नेयमारले दुइ सातापछि हुने रियल म्याड्रिड र बार्सिलोनाको खेल गुमाउने भएका छन्। मालागाको घरेलु मैदानमा भएको खेलमा २-०को पराजय भोगेसंगै बार्सिलोनाले महत्वपूर्ण ३ अंक गुमाएको थियो।

मालागा विरुद्धको खेलमा दुइ पहेंलो कार्ड पाएका नेयमारले लिगको नियमअनुसार १ खेलमात्र गुमाउने थिए तर मैदानबाट बाहिरिने क्रममा चौथो अफिसियललाई व्यंग्यात्मक ढंगले ताली बजाएकाले नेयमारलाइ थप कारवाही हुने भएको हो। बार्सिलोनाले रियल म्याड्रिडसंग अप्रिल २३मा खेल्दैछ र त्यसअघि हुने रियल सोसिडाड विरुद्धको खेलमा नेयमार रेड कार्डका कारण उपलब्ध हुने छैनन्। तर उनको खराब व्यवहारका कारण हुने थप प्रतिबन्धले उनि म्याड्रिड विरुद्धको खेलमा अनुपस्थित हुने भएका हुन्।

रेफ्रीको रिपोर्टमा लेखीए अनुसार विगतमा पनि यस्ता घटनाहरु भएका छन्। सन् २०१२मा भ्यालेन्सियाका सोफिआने फेगुलीले पनि यस्तै घटनामा मुछिंदा ३ खेलको प्रतिबन्ध पाएका थिए। यसैगरी बार्सिलोनाका लुइस सुआरेज पनि रेड कार्ड पाएपछि मैदान छाड्न ढिलाई गर्दा २ खेल प्रतिबन्धमा परेका थिए।

थप १ खेल प्रतिबन्धमा परे पनि नेयमारले म्याड्रिड विरुद्धको खेल गुमाउनेछन्।