मालागा (एजेन्सी)– बार्सिलोनाले स्पेनिस ला लिगाको शीर्ष टोली रियल मड्रिडसँग अंकमा बराबरी गर्ने मौका चुकाएको छ । नेमारले दोस्रो पहेलो कार्ड पछि रातो कार्ड पाउँदै मैदान छोड्नु परेको आइतबार बिहानको खेलमा मालगासँग बार्सिलोना २–० ले स्तब्ध भएको छ ।

केहि घन्टाअघि मड्रिड डर्बिमा रियल र एट्लेटिकोले १–१ को बराबरी खेलेपछि बार्सिलोनाले रियलसँग बराबरी गर्ने मौका पाएको थियो । तर, टोली मौकाको उपयोग गर्न असफल रह्यो । १ खेल बढी खेलेको बार्सिलाना शीर्ष टोली रियल भन्दा ३ अंकले पछि परेको छ । रियलको ७२ र बार्सिलोनाको ६९ अंक छ ।

सान्ड्रो रामिरेजले कमजोर रक्षपक्तिको फाइदा उठाउँदै ३२ औं मिनेटमा पूर्व क्लबविरुद्ध गोल गर्दै मालगालाई अग्रता दिलाएका थिए । दोस्रो हाफ बार्सिलोनाका लागि थप पीडादायी बन्यो । खेलको ६५ औं मिनेटमा दोस्रो पहेलो कार्ड पाउँदै नेमारले मैदान छोडेपछि बार्सिलोना १० खेलाडीमा सिमित भएको थियो ।

कर्नर फ्याग नजिक डिएगो लोरेन्टलाई फाउल हानेपछि नेमारले दोस्रो पहेलो कार्डसँगै रातो कार्ड पाएका थिए । ला लिगामा नेमारले रातो कार्ड सामना गर्नु परेको यो पहिलो पटक हो । इन्जुरी समयमा काउन्टर एट्याकमा जोनीले गोल थपेपछि खेलमा फर्कने बार्सिलोनाको झिनो आशा समाप्त भएको थियो ।

रोसालेडामा बार्सिलोना उच्च मनोबलका साथ उत्रनुका पछाडि बलियो इतिहास थियो । सन् २००३ यता टोली रोसालेडामा अपराजित थियो । तर, यसपटक दृश्य बदलिएको छ । बार्सिलोना निराश भएर फर्केको छ ।

ला लिगाका अन्य खेलमा भिल्लारियलले एथलेटिको बिलबाओलाई ३–१ ले, सेभिल्लाले डिपोर्टिभो लाकुरुनालाई ४–२ ले , इस्पानियोलले अल्भेसलाई १–० ले हराएको छ ।