दिपक बोहोरा
इलाम– त्रिभुवन आर्मी क्लबले आज उपाधि जित्न सके जारी सिजनको सबैभन्दा सफल टोली बन्नेछ । विभागिय टोली आज साउन यता मात्र नकआउट फुटबलको नवौं फाइनल खेल्ने तयारीमा रहेको छ । यसअघिका ८ फाइनल खेल्दा तीन वटा उपाधि जितेको आर्मी आज टुबोर्ग माइभ्याली गोल्ड कप उपाधि उचालेर सर्वाधिक सफल टोली लक्ष्मी हुन्डाई मनाङ मस्र्याङ्दी क्लबसँग नकआउट फुटबलको उपाधि बराबरी गर्ने योजनामा छ ।

साउनमा आर्मीको बागडोर सम्हालेका प्रशिक्षक नवीन न्यौपानेका लागि यो सफलता सपना भन्दा कम छैन । ‘आज जित्न सक्दा मनाङसँग उपाधि बराबर पनि हुन्छ’ मनाङका पूर्व खेलाडी समेत रहेका उनले भने टेलिफोनमा हाम्रो खेलकुदसँग भने,‘हामीले यो सिजन राम्रो खेलेका छौं । यो समेत नौं वटा फाइनल खेल्नु क्लबका लागि उपलब्धी मुलक हो । तर, फाइनल पुगे अनुसार उपाधि जित्न चुकेका छौं । बर्षको अन्तिम उपाधिका रुपमा यसलाई जित्न सके यसअघिका गुनासो पनि मेटिन्छ ।’

मनाङसँग उपाधि बराबरी गर्ने आर्मीका लागि यो बर्षको अन्तिम मौका हो । सिजनमा तीन उपाधि भित्राइसकेको आर्मीले शनिबार दिउँसो ठूलो टुडिखेलमा टुबोर्ग तेस्रो माईभ्याली गोल्ड कपमा रमपम झापालाई हराउन सके मनाङसँग बराबरी गर्नेछ । मनाङले यो सिजन चार उपाधि जितेको छ भने सिएमजी क्लब संकटा र आर्मीको नाममा समान ३ उपाधि छ ।

साविक विजेता समेत रहेको झापा ११ ले भने पुसमा मेची नेत्रालय काँकरभिट्टा गोल्ड कपको उपाधि जितेको थियो । आर्मीले पनि अन्तिम उपाधिका रुपमा पुसमा टुबोर्ग हेटौडा गोल्ड कप जितेको थियो । त्यसयता दुवैले अहर्का उपाधि जितेका छैनन् । हेटौडाअघि आर्मीले चितवनमा नेपाल कप र दुबही गोल्ड कप जितेको थियो । पुसपछिका अधिकांश गोल्ड कपमा भाग लिए पनि आर्मी उपाधि जित्नबाट भने चुकिरहेको छ । आर्मीले यो सिजन सिमरा गोल्डकप, सातौं राष्ट्रिय खेलकुद, विकास रनिङ शिल्ड, राजर्षि जनक कपमा फाइनल खेलेको थियो ।
जारी प्रतियोगिताकै दौरान कप्तान भरत खवास र गोलकिपर विकेश कुथु फर्केपछि टोली थप मजबुद भएको छ । झापाका कप्तान प्रवेश कटुवालले पनि आर्मीको अग्रपक्ति मजबुद रहेको स्वीकारे । त्यसका वावजुद पनि उनले भने,‘ आर्मीको बलियो अग्रपक्ति भएपनि त्यसलाई चिर्दै हामी उपाधि जित्नेछौं ।’

आर्मीका प्रशिक्षक नवीन न्यौपानेले पनि टोली फाइनलका लागि तयारी रहेको बताएका छन् । ‘झापा बलिायो टोली हो । फाइनल बराबरीको हुनेछ,’ उनले भने,‘ यद्दपी हामी उपाधि जित्ने उद्देश्यका साथ उत्रनेछौं ।’ लामो समयदेखि एकसाथ खेल्दै आएका खेलाडी सम्मिलित झापाको टोली मोफसलकै बलियो टोली मानिन्छ ।
माघमा आहा रारा गोल्डकपको क्वार्टरफाइनलपछि आर्मी र झापाबीच पहिलो पटक भेट हुँदैछ । त्यहाँ आर्मी २–० ले विजयी भएको थियो । त्यो खेलमा नवयुग श्रेष्ठ र भरत खवासले गोल गरेका थिए । अहिले आराम गरिरहेका नवयुग भने शनिबारको खेलमा हुने छैनन् ।
इलाम जिल्ला फुटबल संघ र माइभ्याली फुटबल क्लबले संयुक्त रुपमा आयोजना गरेको प्रतियोगिताको विजेताले ४ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ ।