दिपक बोहोरा
इलाम– सिजनको सर्वाधिक सफल टोली लक्ष्मी हुन्डाई मनाङ मस्र्याङ्दी क्लबसँग नकआउट फुटबलको उपाधि बराबरी गर्ने अन्तिम मौका त्रिभुवन आर्मी क्लबसँग छ । सिजनमा तीन उपाधि भित्राइसकेको आर्मीले शनिबार दिउँसो ठूलो टुडिखेलमा टुबोर्ग तेस्रो माईभ्याली गोल्ड कपमा रमपम झापालाई हराउन सके मनाङसँग बराबरी गर्नेछ । मनाङले यो सिजन चार उपाधि जितेको छ भने सिएमजी क्लब संकटा र आर्मीको नाममा समान ३ उपाधि छ ।

साविक विजेता समेत रहेको झापा ११ ले भने पुसमा मेची नेत्रालय काँकरभिट्टा गोल्ड कपको उपाधि जितेको थियो । आर्मीले पनि अन्तिम उपाधिका रुपमा पुसमा टुबोर्ग हेटौडा गोल्ड कप जितेको थियो । त्यसयता दुवैले अर्को उपाधि जितेका छैनन् । हेटौडाअघि आर्मीले चितवनमा नेपाल कप र दुबही गोल्ड कप जितेको थियो । पुसपछिका अधिकांश गोल्ड कपमा भाग लिए पनि आर्मी उपाधि जित्नबाट भने चुकिरहेको छ ।
जारी प्रतियोगिताकै दौरान कप्तान भरत खवास र गोलकिपर विकेश कुथु फर्केपछि टोली थप मजबुद भएको छ । चियाबारी राष्ट्रिय दैनिकको संयोजनमा शुक्रबार भएको पत्रकार सम्मेलनमा झापाका कप्तान प्रवेश कटुवालले पनि आर्मीको अग्रपक्ति मजबुद रहेको स्वीकारे । त्यसका वावजुद पनि उनले भने,‘ आर्मीको बलियो अग्रपक्ति भएपनि त्यसलाई चिर्दै हामी उपाधि जित्नेछौं ।’

आर्मीका प्रशिक्षक नवीन न्यौपानेले पनि टोली फाइनलका लागि तयारी रहेको बताएका छन् । ‘झापा बलिायो टोली हो । फाइनल बराबरीको हुनेछ,’ उनले भने,‘ यद्दपी हामी उपाधि जित्ने उद्देश्यका साथ उत्रनेछौं ।’ लामो समयदेखि एकसाथ खेल्दै आएका खेलाडी सम्मिलित झापाको टोली मोफसलकै बलियो टोली मानिन्छ ।

माईभ्याली गोल्ड कपको फाइनलअघिको पोस्टम्याच कन्फ्रेस हरेक बर्ष अलग अलग सञ्चारमाध्यमले संयोजन गर्ने परम्परा छ ।