प्रकाश तिमल्सिना
काठमाडौं – चोटमुक्त भएर सक्रिय खेल जीवनमा फर्केका छोटो समयमा राष्ट्रिय फुटबल टोलीका मिडफिल्डर रोहित चन्दको व्यवसायिक खेल जीवनले नयाँ उडान भरेको छ । झन्डै दुई साताअघि मात्र राष्ट्रिय टोलीमा पुनरागमन गरेका मिडफिल्डर रोहित पुनः इन्डोनेसियन क्लबमा आबद्ध भएका छन् । इन्डोनेसिया लिगा १ क्लब पर्सिजा जकार्तासँग एक सिजनको लागि उनले आजै सम्झौताका गरेका छन् । 

रोहितको क्लबसँगको सम्झौता ७ जनवरी २०१८ सम्म रहेने उनका दाजु रविन्द्र ले बताएका छन् । उनी यसअिघ सन् २०१२ देखि २०१५ सम्म पनि सोही क्लबबाट खेलेका थिए । यो सिजन उनले क्लबमा सेन्टर मिड र सेकेन्ड स्ट्राइकरको भूमिका निर्वाह गर्नेछन् । दुई दिनको प्रशिक्षण पछि उनी क्लबको रोजाइमा परेका थिए । अघिल्लोपल्ट मासिक ३ हजार ५ सय अमेरिकी डलरमा सम्झौता गरेका रोहितले यस पटक भने रकम खुलाएनन्।

यसै साता त्यहा पुगेका उनले इन्डोनेसियाको यू २२ सँगको मैत्रीपूर्ण खेल खेलेका थिए । क्लबका ब्राजिलियन प्रशिक्षक स्टेफानो कुगुराले रोहितको पुनरागमनमा खुसी व्यक्त गरेको उनका दाजु रविन्द्रले बताए । स्टेफानोले यू २२ सँगको अभ्यास खेलमा रोहितको प्रदर्शन स्तरीय रहेको बताएका छन् । क्लबमा एसियाली खेलाडीको कोटाका लागि रोहित अर्का इराकका राष्ट्रिय खेलाडी अन्मर अलमुबाराकी थिए । तर, स्टेफानोको पहिलो रोजाइमा रोहित नै परे ।

रोहित त्यस्ता थोरै नेपाली खेलाडीमा पर्दछन्, जसको व्यवसायिक खेल जीवन स्वदेश भन्दा विदेशमा बढी वितेको छ । उनले यसअघि मलेसियाली क्लब र भारतीय लिग (आइलिग) बाट समेत खेलिसकेका छन् । मच्छिन्द्र क्लबबाट लिगमा डेब्यू गरेको अर्को सिजन उनी आइलिग टोली एचसिएल पुगेका थिए ।

चोट मुक्त भएर उनी केही महिना अघि मात्र सक्रिय खेल जीवनमा फर्केका थिए । लक्ष्मी हुन्डाई मनाङ मस्र्याङ्दी क्लबबाट तीन वटा नकआउट फुटबल खेल्दै उनले राष्ट्रिय टोलीमा पुरागमन गरेका थिए । एसियन कप छनोटअन्तर्गत चैत १५ गते फिलिपिन्सविरुद्ध खेलमा उनी पहिलो रोजाइमा थिए । १७ बर्षकै उमेरमा राष्ट्रिय टोलीबाट डेब्यू गरेका उनले ४४ क्याप जितिसकेका छन् ।

उनको व्यवसायिक खेल जीवन चम्किलो रहेपनि व्यक्तिगत रुपमा अघिल्लो बर्ष उनका लागि पीडादायी रह्यो । नेपालले तीन अन्तराष्ट्रिय उपाधि जित्दा उनी टोलका सदस्य थिएनन् । घुँडाको चोटका कारण उनले नौ महिना मैदान बाहिर रहनु पर्यो । उनि मैदान बाहिर रहेकै बेला नेपालले कात्तिकमा एएफसी सोलिडारिटी कप जितेर अहिलेसम्मकै ठुलो उपलब्धि हासिल गर्यो । तर उनको भूमिका त्यो बखत दर्शकमै सिमित थियो ।
तर उनले हिम्मत हारेनन् । चोटमुक्त भएर उनी पुरानै जोशमा मैदान फर्किए । मनाङबाट माघमा पोखरामा भएको १५ औं आहा रारा गोल्डकप फुटबल प्रतियोगिता खेल्दै उनले पुनरागमन गरेका थिए । त्यसपछि उनले झापा गोल्डकप र बंगलादेशमा शेख कमल क्लब कप खेले । त्यसपछि उनी सोझै राष्ट्रिय टोलीको प्रशिक्षणमा बोलाइए ।

गत बर्षको फेब्रुअरीमा मलेसियाको टि टिम एफसीका लागि खेल्दा एसिएल चोट लागेपछि रोहितले उतै शल्यक्रिया गरेका थिए। त्यसपश्चात डाक्टरको सल्लाहअनुसार केहि महिना विश्राम लिएका रोहितले कोलकातामा गएर ग्राउण्ड रिकभरी गरे । केहि महिना फिटनेसका लागि आफैं प्रशिक्षण गरेका रोहितले फुटबल मैदानमा फर्किन मनाङको साथ रोजेका थिए ।

चोटमुक्त भएर मैदान फर्कदा आफुले धेरै मेहेनत गरेको र त्यस दौरान परिवार, साथीहरु र आफ्नो फिजियोको सहयोगले झनै हौसला मिलेको उनले बताएका थिए । उनले भनेका थिए,‘चोटबाट पुनरागमन गर्ने दौरानमा मलाई धेरै तर्फबाट साथ पाए । विशेषत म फिजियोहरुलाई धन्यवाद दिन चाहन्छु । उहाँहरुको कारण नै यति चाँडो र प्रभावकारी रुपमा मैदानमा फर्कने सकें।’