काठमाडौँ (हाम्रो खेलकुद) – एएफसी सोलिडारिटी कप जितेयता नेपाल फिफा वरियतामा लगातार माथि उक्लिने क्रम यो महिना भने रोकिएको छ । अन्तर्राष्ट्रिय फुटबल संघ (फिफा) ले अप्रिल महिनाका लागि बिहीबार सार्वजनिक गरेको वरियतामा १ सय ७० औं स्थानमा यथवात छ ।

मार्चमा पनि १ सय ७० औं स्थानमा रहेको नेपालको १ सय १२ अंक छ । फेब्रुअरीमा नेपाल १ सय ७३ औं स्थानमा थियो । नेपालले कात्तिकको अन्तिममा मलेसियाको कुचिङमा आयोजित एएफसी सोलिडारिटी कप जितेको थियो ।

त्यो नेपालले प्राप्त गरेको अहिले सम्मकै ठूलो उपाधि हो । नेपालले एसियाली फुटबल महासंघ (एएफसी) को आधिकारिक प्रतियोगिता जितेको पनि त्यो पहिलो नै थियो । त्यसयता नेपाल फिफा वरियतामा विस्तारै सुधार भएको थियो ।
वरियताक्रममा यथावत रहेपनि गत महिना दक्षिण एसियाली राष्ट्रमा चौथो स्थानमा रहेको नेपाल पाँचौं स्थानमा झरेको छ । अघिल्लो महिना १ सय ७७ औं स्थानमा रहेको भुटान १३ स्थान फड्को मार्दै १ सय ६४ औं स्थानमा पुगेको छ ।
३१ स्थान माथि उक्लेको भारत १ सय १ स्थानमा रहँदै भारत दक्षिण एसियाली राष्ट्रको शीर्षस्थानमा यथावत छ । यो क्षेत्रका अन्य देश अफगानिस्तान १ सय ५३ औं, माल्दिभ्स १ सय ५१ औं, भुटान १ सय ६४ औं, बंगलादेश १ सय ९३ औं र पाकिस्तान २ सय १ औं स्थानमा छ ।
पछिल्लो वरियताका क्रममा ब्राजिल शीर्षस्थानमा पुगेको छ । ब्राजिल ७ बर्षयता पहिलो पटक शीर्षस्थानमा पुगेको हा । अर्जेन्टिना दोस्रो र जर्मनी तेस्रो स्थानमा छ ।