बार्सिलोना (एजेन्सी)– लियोनल मेस्सीले गए राती स्पेनिस ला लिगामा पुनरागमन गरेको खेलमा २ गोल गरेपछि बार्सिलोनाले सेभिल्लालाई ३–० ले हराएको छ । जितसँगै उपाधि दौडमा बार्सिलोनाले रियल मड्रिडमाथि दबाब कायम राखेको छ । मेस्सीले २ गोल गर्नुअघि टोलीका लागि लुइस स्वारेजले गोल गरेका थिए । टोलीको तीनै गोलमा मेस्सीको भूमिका रह्यो ।

रियलले लेगानेसको सामना गर्नु भन्दा केहि समय अघि भएको खेलमा अंक तालिकाको चौथो टोलीमाथिको जितपछि बार्सिलोना केही समयका लागि शीर्षस्थानमा पुगेको थियो ।

खेलको २५ औं मिनेटमा स्वारेजले अग्रता दिलाएका थिए । मेस्सीले विपक्षका तीन रक्षकलाई दिएको पासलाई स्वारेजले गोल गरेका हुन् । त्यसको तीन मिनेट नवित्दै मेस्सीले गोल गरे । स्वारेजले मिलाईदिएको बलमा मेस्सीले गोल गरेका हुन् ।

३३ औं मिनेटमा मेस्सीले अर्को गोल गरे । नेइमारको कर्नरलाई निको परेजाले क्लियर गरेपनि बल मेस्सीसामु आइपुग्दा उनले १० यार्डबाट प्रहार गरेको भली गोलमा परिणत भएको थियो ।

दोस्रो हाफमा सेभिल्लाले गोल गर्ने मौका सिर्जना गर्न नसकेपछि बार्सिलोनालाई पहिलो हाफको प्रदर्शन जितकालागि काफी रह्यो ।

अर्को खेलमा शीर्ष टोली रियलले लेगानेसमाथि ४–२ को नतिजा निकाल्दै बार्सिलोनासँगको २ अंकको अन्तरलाई कायम राख्यो । रियालको ७१ अंक छ । ला लिगामा बुधबारका अन्य खेलमा एट्लेटिको मड्रिडले रियल सोसिडाडलाई ,भिल्लारियलले रियल बेट्सिलाई, ओसासुनाले अल्भेसलाई र मालागाले स्पोर्टिङ गिजोनलाई समान १ –० ले हरायो भने ग्रानाडा र डिर्पोटिभो ला कुरुनाले गोलरहित बराबरी खेले ।

हाइलाइट्स