दिपक बोहोरा
इलाम – टुबोर्ग तेस्रो माईभ्याली गोल्ड कप फुटबल प्रतियोगिताको पहिलो सेमिफाइनलमा दुई विभागिय टोलीबीच भिडन्त हुँदैछ । यसपटक माईभ्याली गोल्डकपमा सेमिफाइनलमा तीनै विभागिय टोली र रमपम झापा ११ ले स्थान सुरक्षित बनाएका थिए ।

ठूलो टुडिखेलमा हुने सेमिफाइनलमा त्रिभुवन आर्मी र नेपाल पुलिस क्लबले एकअर्काको सामना गर्दैछन् । दुई टोलीबीचको तुलाना गर्ने हो भने यो सिजन आर्मीले बढी सफलता प्राप्त गरेको छ । राजधानीमा फुटबल प्रतियोगिता शून्यका अवस्थामा रहँदा आर्मी र पुलिसले मोफसलका अधिकांश प्रतियोगितामा हिस्सा लिएका छन् ।

ती मध्ये आर्मीले तीन उपाधि जित्दा पुलिसले भने एउटा उपाधिमा मात्र चित्त बुझाउनु परेको छ । चितवनमा नेपाल कप, दुहबी गोल्ड कप र पुसमा हेटौडा गोल्ड गोल्ड कप जितेयता आर्मीले कुनै उपाधि जितेको छैन । उता पुलिसले बर्षको एकमात्र उपाधिका रुपमा गत महिना बुढासुब्बा गोल्ड कपको उपाधि जितेको थियो ।

जारी प्रतियोगितामा भने पुलिसले चार उपाधि जितेको सिजनको सर्वाधिक सफल टोली लक्ष्मी हुन्डाई मनाङ मस्र्याङ्दीलाई क्वार्टरफाइनलमा १–० ले हराएको थियो । पुलिसले त्यसअघि आयोजक माईभ्याली फुटबल क्लबलाई ३–० ले हराएको थियो । आर्मीले भारतको कञ्चनजंगा फुटबल क्लब सिलगुढीलाई २–१ ले निराश पार्दै अन्तिम चारमा पुगेको थियो ।

आजको खेलको विजेताले झापा र नेपाल एपिएफको विजेतासँग शनिबार फाइनल खेल्नेछ । दोस्रो सेमिफाइनल बिहीबार हुनेछ । इलाम जिल्ला फुटबल संघ र माईभ्याली फुटबल क्लबले संयुक्त रुपमा आयोजना गरेको प्रतियोगिताको विजेताले उपाधिसहित ४ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ ।