काठमाडौं, असोज २०
उपाधि दाबेदारमध्येका लक्ष्मी हुन्डाई मनाङ मस्याङ्दी क्लब र रमपम झापा ११ आज रेडबुल राष्ट्रिय लिगमा प्रतिस्पर्धा गर्दैछन् । उपाधि सम्भावनालाई बलियो बनाउन दुवैलाई जित जरुरी छ । झापालाई सफलता मिले टोली पूर्ण रुस्लान थ्री स्टार क्लबलाई पछि पार्दै शीर्षस्थानमा उक्लने छ । मनाङ जिते झापालाई पछि पार्दै तेस्रो स्थानमा उक्लने छ ।

बराबरीमा चित्त बुझाए त्यसको फाइदा दौडमा रहेका थ्री स्टार र त्रिभुवन आर्मी क्लबलाई फाइदा पुग्नेछ । बराबरीमा झापा दोस्रो स्थानमा पुग्ने छ भने मनाङ यथास्थानमै रहनेछ । बराबरीले दुवैलाई उपाधि दौडबाट बाहिर पुर्याउन सक्छ । थ्रीस्टारको २६, आर्मी र झापाको समान २४, मनाङको २२ र एपिएफको २० अंक छ ।

फाइल तस्विर – झापा-११ गोलपछि खुसी साट्दै ।

झापा पहिलो पटक एन्फाको एष्ट्रो टर्फमा खेल्दैछ । घरेलु मैदानमा सबै खेल खेलिसकेको झापाले अब बाँकी तीनै खेल एन्फामै खेल्ने छ । उता मनाङमा भने खेलाडी चोट र निलम्बन टाउको दुखाई छ । मिडफिल्डर सुजल श्रेष्ठ र गोलकिपरका विशाल श्रेष्ठ चोटले गर्दा लिगभर उपलब्ध हुने सम्भावना कम छ । प्रभावशाली मिडफिल्डर सुशील केसी र रक्षक विक्रम लिम्बु दोहोरो पहेलो कार्डको प्रतिबन्धका कारण झापाविरुद्ध खेल्न पाउने छैनन् । त्यस विपरित झापामा चोट वा निलम्बन छैन । टोलीका फरवार्ड कर्ण लिम्बु ११ गोलसहित सर्वाधिक गोलकर्ताको शीर्षस्थानमा छन् । एनआरटी र थ्री स्टारका पूर्व स्टार मिडफिल्डर रञ्जित श्रेष्ठको साथले झापाको मनोबल थप बढाएको छ । झापामा गणेश खड्काको गोलमा मनाङ १-० ले पराजित भएको थियो । २ः३० बजे सुरु हुने खेलको नतिजाले लिग दौडलाई अझै साँघुरो बनाउन सक्छ ।