दिपक बोहोरा

इलाम– राष्ट्रिय टोलीका चार खेलाडी उतारेपनि जारी सिजनको सफल क्लबमध्येको एक सिएमजी क्लब संकटा माईभ्याली गोल्ड कपको आफ्नो पहिलो खेलमै स्वब्ध भएको छ । राष्ट्रिय टोलीका विमल घर्तीमगर, अनन्त तामाङ, विक्रम लामा र गोलकिपरलाई आफ्नो जर्सीमा उतारेपछि मंगलबार संकटा ए डिभिजन प्रतिद्वन्दी नेपाल एपिएफ क्लबसँग १–० ले पराजित भएको छ ।

जितसँगै एपिएफ सेमिफाइनल पुगेको छ । म्याईभ्यालीको सेमिफाइनलमा चारमध्ये तीन विभागिय टोली अन्तिम चार पुगेका छन् । त्यसबाहेक रमपम झापा ११ सेमिफाइनल पुगेका छ । पहिलो हाफमा नबिन लामाले गरेको एक गोलनै सशस्त्र प्रहरीको लागि सेमिफाइनल पुग्नको लागि पर्याप्त रह्यो ।

खेलको १७ औं मिनेटमा संकटाका अमित तामाङले ब्याक पास दिन खोज्दा गल्ती गरेपछि त्यसको फाइदा उठाउँदै एपिएफका नविनले गोल गरेका हुन् । नवीननै खेलको म्यान अफ दी म्याच घोषित भए । अब एपिएफले सेमिफाइनलमा बिहीबार झापा ११ को सामना गर्नेछ ।

यो हारसँगै संकटा जारी सिजन सर्वाधिक ४ उपाधि जित्ने लक्ष्मी हुन्डाई मनाङ मस्र्याङ्दीसँग बराबरी गर्नबाट चुकेको छ । संकटाले चितवनमा विकास रनिङ शिल्ड, रुस्लान सिमरा गोल्डकप र तिलोत्तमा गोल्डकप जितेको थियो ।

इलाम जिल्ला फुटबल संघ र माइभ्याली फुटबल क्लबको संयुक्त आयोजनामा जारी प्रतियोगिताको विजेताले ४ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ । प्रतियोगिताको उत्कृष्ट खेलाडीले यमाहाको १ सय ५० सिसीको मोटरसाइकल प्राप्त गर्नेछन् ।

माईभ्याली गोल्ड कपमा मंगलबारको पहिलो सेमिफाइनल
त्रिभुवन आर्मीविरुद्ध नेपाल पुलिस