एजेन्सी– युरोपमा सिजनको अन्त्य नहुँदै स्टार खेलाडी अर्को सिजन कुन क्लबमा जाने चर्चा सुरु हुने गर्दछ । हरेक ट्रान्फर विन्डोमा कुन खेलाडी कुन क्लबमा कति रकममा जान्छन् भन्नेमा संसारभरका फुटबल समर्थकहरुका बीचमा पनि चासो रहने गरेको छ ।

सिजनको अन्त्य नहुँदै अर्को सिजन कुन खेलाडी कहाँ हुन सक्छन् भन्ने अनुमान सुरु भइसकेको छ । त्यसमध्ये केही चर्चित खेलाडीको सरुवा र नयाँ सम्झौतका विषयमा यहाँ उल्लेख गरिएको छ ।

१. ज्लाटन इब्राहिमोभिच – म्यानचेस्टर युनाइटेडका इब्राहिमोभिच अमिरिकी मेजर लिग क्लब एल ए ग्यालेक्सीमा आबद्ध हुने हल्ला चुलिएको छ । फक्स डे स्पोट्र्सका अनुसार जुनसम्म युनाइटेडसँग सम्झौतामा रहेका उनले ग्यालेक्सिमा यसअघि सुपरस्टार डेविड बेकह्यामले पाएको भन्दा धेरै रकम पाउनेछन् ।

२. एलेक्सिस स्यान्चेज – चिलीका फरवार्ड स्यान्चेजले चेल्सी जाने चाहना व्यक्त गरेपनि आर्सेनल आफ्नो स्टार खेलाडीलाई घरेलु प्रतिस्पर्धाबाट टाढै राख्न खोजेको छ । द टेलिग्राफका अनुसार स्यान्चेजले लन्डनमै सबै उपाधिको लागि प्रतिस्पर्धा गर्ने क्लबमा आबद्ध हुने चाहना व्यक्त गरेका छन् ।

३. लियोनाल मेस्सी– मेस्सीले बार्सेलोनासँग अर्को पाँच बर्षको लागि सम्झौता लम्बाउने भएका छन् । मेस्सीले सम्झौता नबिकरण नगर्ने हल्ला चलेपछि युरोपका ठूला क्लबले उनलाई भित्राउने तयारी सुरु गर्नु अगावै बार्सिलोनासँग अर्को महिना सम्झौता नविकरण गर्ने काडेना सेरले खुलासा गरेको हो ।

४. डेभिड डि जिया र एडेन हाजार्ड – रियल म्याड्रिडले प्रिमियर लिगबाट दुई खेलाडी अनुबन्धन गर्ने चाहेको छ । डेली मिररले जनाए अनुसार रियलले म्यानचेस्टर युनाइटेडका गोलकिपर डी जिया र चल्सीका स्टार हाजार्डलाई लिन खोजेको हो ।

५. नेमार –चेल्सी र म्यानचेस्टर युनाइटेड नेमारलाई भित्राउन आतुर देखिएका छन् । सन्डे टाइम्सका अनुसार प्रिमियर लिग दुवै टोली नेमारका लागि कीर्तिमानी १ सय ७० मिलियन पाउण्ड खर्चिन तयार छन् । ब्राजिली अन्तराष्ट्रिय खेलाडी नेमारलाई सबै भन्दा धेरै कामाउने खेलाडी बनाउन चेल्सी र युनाइटेड तयार देखिएका छन् ।