दिपक बोहोरा

इलाम – राष्ट्रिय टोलीका चार खेलाडी टुबोर्ग माईभ्याली गोल्ड कप फुटबल प्रतियोगिताको आज हुने अन्तिम क्वार्टरफाइनलमा सिएजमी क्लब संकटाबाट खेल्दैछन् । नेपाल एपिएफविरुद्ध हुने खेलमा विमल घर्तीमगर, अनन्त तामाङ, विक्रम लामा र गोलकिपर विशाल श्रेष्ठ संकटाको जर्सीमा उत्रनेछन् । विशालबाहेक तीन जना पहिलो पटक संकटाको जर्सी लगाउँदैछन् ।

गत साता फिलिपिन्सविरुद्ध एसियन कप छनोट खेलेपछि यी चार खेलाडी पहिलो पटक मैदान ओर्लदैछन् । चैत १५ मा फिलिपिन्ससँगको खेल नेपालले ४–१ ले गुमाएको थियो । २०७२ को फागुनमा राष्ट्रिय लिगको समाप्तीसँगै क्लबसँग खेलाडीको सम्झौता टुंगिएको थियो । त्यस कारण पनि लगभग हरेक नकआउट प्रतियोगितामा क्लबहरुले फरक फरक खेलाडीलाई उतारेको उदाहरण छ ।

रुस्लान थ्री स्टारबाट राष्ट्रिय लिग खेलेका विक्रम पछिल्लो समय लक्ष्मी हुन्डाई मनाङबाट खेलेका थिए । त्यस्तै चोटमुक्त भएर फर्केपछि अनन्तले सिमराको जनजागृति क्लबबाट एक खेल खेले । विमलले केही महिनाअघि अग्नी रुपन्देही ११ बाट सुरुगां गोल्ड कप खेलेका थिए ।

फिलिपिन्सबाट फर्केपछि चारै खेलाडीले खासै अभ्यास गर्न पाएका छैनन् । केहि दिनअघि मात्र इलाम पुगेका उनीहरुले हिजो यहाँको प्रतिकुल मौसमका कारण अभ्यास गर्न पाएनन् । संकटा यो सिजन सफल क्लब मध्ये पर्दछ । यो सिजन मनाङपछि सफल टोलीमा संकटा र त्रिभुवन आर्मी क्लब पर्दछन् । मनाङले चार तथा संकटा र आर्मीले समान ३ नकआउट उपाधि जितेका छन् । संकटाले विकास रनिङ शिल्ड, सिमरा गोल्ड कप र तिलोत्तमा गोल्ड कप जितेको थियो ।

अर्कोतर्फ पुसमा सातौं राष्ट्रिय खेलकुदमा स्वर्ण पदक जितेयता एपिएफको प्रदर्शन कमजोर रहँदै आएको छ । चोटका कारण राष्ट्रिय टोलीका सदस्य रहेका एपिएफका आदित्य चौधरी, रञ्जन विष्ट आज संकटाविरुद्ध उत्रने सम्भावना कम रहेको बताइएको छ ।

आजको खेलको विजेताले सेमिफाइनलमा झापा ११ को सामना गर्नेछ । झापासँगै आर्मी र पुलिस यसअघि नै प्रतियोगिताको सेमिफाइनल पुगिसकेका छन् । इलाम जिल्ला फुटबल संघ र माइभ्याली फुटबल क्लबको आयोजनामा सञ्चालित प्रतियोगिताको विजेताले ४ लाख रुपैयाँ प्राप्त गर्नेछ ।