दिपक बोहोरा
इलाम – घरेलु फुटबलमा यो सिजनको सर्वाधिक सफल टोली लक्ष्मी हुन्डाई मनाङ मस्र्याङ्दी क्लब माईभ्याली गोल्ड कपको आफ्नो पहिलो खेलमै स्वब्ध भएको छ । गत साता राजर्षि जनक कप जितेर इलाम पुगेको मनाङ ए डिभिजन प्रतिद्वन्द्वि नेपाल पुलिस क्लबसँग  सोमबार १–० ले पराजित हुँदै प्रतियोगिताबाट बाहिरिएको छ । जितसँगै पुलिस सेमिफाइनल पुगेको छ ।

३६ औं मिनेटमा अभिषेक रिजालले गरेको गोलनै पुलिसलाई सेमिफाइनल यात्रा गर्न पर्याप्त रह्यो । पुलिसले सेमिफाइनलमा अर्को विभागिय टोली त्रिभुवन आर्मी क्लबको सामना गर्नेछ । भोला सिलवालको फ्रिकिकमा अभिषेकले गोल गरेका थिए । खेलको म्यान अफ दी म्याच बनेका भोलाले ७ हजार रुपैयाँ प्राप्त गरे ।

केही बर्षअघि सम्म घरेलु फुटबलमा सबै खाले फुटबलको दाबेदार रहने गरेको पुलिस पछिल्लो समय भने कमजोर रहँदै आएको छ । यद्दपी आजको खेलमा मनाङको कमजोर अग्रपक्ति र तालमेल अभावको फाइदा उठाउँदै अघिल्लो चरणको यात्रा गर्न सफल भएको छ । पुलिसले यो सिजनमा एउटा मात्र उपाधि जित्न सकेको छ । पुलिसले गत महिना धरानमा भएको १९ औं बुढासुब्बा गोल्ड कपको उपाधि जितेको थियो ।

 मनाङले भने यो बर्ष सबैभन्दा बढी यो सिजन चार वटा उपाधि जितिसकेको छ । सुदूरपश्चिमाञ्चलमा माघको पहिलो साता सुदूरपश्चिम खप्तड गोल्ड जित्दै उपाधि यात्रा सुरु गरेको मनाङले त्यसपछि लगातार आहा रारा गोल्डकप र रमपम झापा गोल्डकपको उपाधि जितेको थियो । टोलीका नियमित ८ खेलाडी विना पनि टोली गत साता सर्लाहीमा राजर्षि जनक कप जितेको थियो ।

तर, राष्ट्रिय टोलीको जिम्मेवारी पुरा गरेर ८ खेलाडी टोलीमा फर्केपनि टोलीले अपेक्षा अनुसारको प्रदर्शन गर्न सकेन, जसका कारण टोली बर्षको पाँचौं उपाधि उचाल्ने अभियानबाट विमुख हुन पुग्यो । हुस्सुका कारण सोमबारको खेल पटक पटक अबरुद्ध भएको थियो । इलाम जिल्ला फुटबल संघ र माइभ्याली फुटबल क्लबलको संयुक्त आयोजनामा जारी प्रतियोगितामा त्रिभुवन आर्मी क्लब र झापा सेमिफाइन पुगिसकेका छन् ।

माईभ्याली गोल्ड कपमा मंगलबारको अन्तिम क्वार्टरफाइनल
सिएमजी क्लब संकटाविरुद्ध एपिएफ