इरानमा भइरहेको ए.एफ्.सी यु१९ च्याम्पिएनसिप छनोटमा नेपाल आफ्नो समुहको अन्तिम खेलमा जोर्डनसंग ३-०को हार व्येहोरेको छ|

समुहको अन्तिम खेलमा जोर्डनले पहिलो हाफको सुरुवाती १५ मिनेटमै दुइ गोल गरेर दवाव दियो| जोर्डनका लागि छैटौं मिनेटमा महमुद हम्माद र चौधौं मिनेटमा महर हिज्जाजीले गोल गरेका थिए| नेपालले जोर्डन बिरुद्ध पनि कुवेतसंग खेलेको टोलिलाई नै पहिलो रोजाइमा उतारेको थियो|नेपालले तेश्रो गोल खेलको दोश्रो हाफको अतिरिक्त समयमा खाएको थियो थप समयको दोश्रो मिनेटमा बैकल्पिक खेलाडी इब्राहिम शेले गोल गरेर जोर्डनलाई ३-०को जित दिलाए|

पहिलो खेलमा इरानसंग १०-०को फराकिलो हार व्यहोरेको नेपालले दोश्रो खेलमा कुवेतसंग १-१को बराबरी खेलेको थियो| नेपालले दोश्रो खेलमा कप्तान विमल घर्ती मगरको गोलले अग्रता लिएपनि खेलको अन्त्यतिर गोल खाएर बराबरीमा रोकिएको थियो|

पाँच उत्कृष्ट समुह उपविजेता पनि अन्तिम चरणमा जाने भएकाले यस खेलअघि पनि नेपालको गणितिय सम्भावना जिवितै रहेको थियो| जोर्डनलाई हराएको खण्डमा नेपालको छनोट हुने झिनो आशा थियो| तर यस हारसंगै नेपाल समुहको पुछारमा रही छनोट चरणबाट बाहिरिएको छ|

गत महिना किर्गीस्तान्मा भएको यु१६को छनोटमा पनि नेपाल पाँच उत्कृष्ट उपविजेता मध्य एक भएर अन्तिम चरणमा पुगेको थियो| त्यसबेला अन्य खेलको नतिजा नेपालको छनोटको लागि अनुकुल हुँदा अन्तिम चरणमा पुग्न सफल भएको थियो|