स्पेन (एजेन्सी ) –एल क्लासिकोमा भिड्ने स्पेनका दुई ठूला क्लब रियल मड्रिड र बार्सिलोना सामाजिक संजालमा पनि अप्रत्यक्ष रुपमा भिडेका थिए ।

लोकप्रिय सामाजिक संजाल फेसबुकमा १ सय मिलियन (१० करोड) लाइक बनाउने पहिलो स्पोट्र्स क्लब बन्न दुइ टोली बीच होडबाजीमा रियलले बाजी मारेको छ । बार्सिलोनाले पहिले १ सय मिलियन लाइक पुर्याउनका लागि विभिन्न तपरियका अपनाएको थियो ।

बार्सिलोनाले औपचारिक ट्विटरमा प्रचार गर्दै समर्थकहरुलाई फेसबुक पेज लाइक गर्न आव्हान गरेको छ । क्लबले ट्विट गरेको थियो ‘हामिलाई फेसबुकमा लाइक गरि १ सय मिलियन लाइक पुर्याउन मद्दत गर्नुहोला ।’

अर्को उपाय अपनाउने क्रममा बार्सिलोनाले फेसबुक पेज लाइक गर्ने समर्थकलाई लुइस स्वारेज , नेइमार र लियोनल मेस्सीको हस्ताक्षर सहितको जर्सी जित्ने अवसर दिदै प्रोत्साहित गरेको थियो ।

अर्कोतर्फ रियलले पनि समर्थकहरुलाई फेसबुकमा औपचारिक पेज लाइक गरेर क्रिस्टियानो रोनाल्डोको हस्ताक्षर अंकित जर्सी दिने घोषणा गरेको थियो । फेसबुक पेज लाइक बढाउन रियलले पनि सक्दो प्रयास गरेको थियो । रियलले फेसबुकमा विज्ञापन समेत गरेको थियो ।

दुवै टोलीले एकै दिन १ सय मिलियन लाइक बनाएपनि रियलले बार्सिलोनाको भन्दा ९ घन्टा अगाडि १ सय मिलियनको लक्ष्य पुरा गरेको थियो ।

१ सय मिलियनले फेसबुक पेज लाइक हुने पहिलो क्लब भन्दै रियलले फेसबुक पेजमा सेयर पनि गरेको थियो ।