स्पेन (एजेन्सी) – अर्जेन्टिनाका कप्तान तथा बार्सिलोनाका स्टार खेलाडी लिओनल मेस्सीले चिलीविरुद्ध भएको विश्वकप छनोट अन्तर्गत गत साता खेलिएको खेलमा अपशब्द प्रयोग गरेको आरोपमा फिफाबाट चार खेलको प्रतिबन्ध पाए।

मेस्सीलाई साथ दिने धुनमा फिफाको यस कदमलाई आलोचना गर्दै बार्सिलोनाले आफ्नो पुरानो सम्बन्धमा धरापमा पारेको छ। विगतमा सेप ब्लाटर फिफाको अध्यक्ष हुँदा चिसिएको बार्सिलोना र फिफाको सम्बन्ध जियानी इन्फानटिनोको आगमनसंगै केहि सुधारिएको थियो। ब्लाटर अध्यक्ष हुँदा फिफाले बार्सिलोनालाई एकेडेमीमा खेलाडी अवैध रुपमा अनुबन्धन गरेको आरोपमा जरिवानाका साथै प्रतिबन्धका र विश्वकपका दौरान लुइस सुआरेजलाई टोकेको आरोपमा गरेको प्रतिबन्धमा बार्सिलोनाले खुलेआम असन्तुष्टि जनाएको थियो।

तर, बार्सिलोनाले मेस्सीको पक्षमा गरेको यो कदमसंगै फिफा र बार्सिलोनाको सम्बन्धमा केहि बदलाव आउने निश्चित छ। मेस्सीले बार्सिलोनामा नयाँ अनुबन्धन गर्न बाँकी रहेको अवस्थामा मेस्सीको सहानुभूति जित्न यो कदम चालेको आरोप पनि बार्सिलोनालाइ लागेको छ।

भावी अध्यक्षका रुपमा हेरिदै आएका बार्सिलोनाका उपाध्यक्ष जोर्डी कार्डोनरले मेस्सीको प्रतिबन्धको विषयमा फिफाले पुनर्विचार गर्नुपर्ने अभिव्यक्ति दिइसकेका छन्। “यो प्रतिबन्ध एकदम धेरै हो र अचम्मको कुरा यो छ कि फिफाले यस्तो घटनामा पहिलोपटक कदम चालेको छ”, उनले भने।

अर्जेन्टिनाबाट मेस्सीले नखेल्नु बार्सिलोनालाई फाइदाजनक भएपनि क्लबले फिफाले चालेको यस कदमप्रति खेद प्रकट गर्दै मेस्सी अझै पनि ‘मैदान भित्र र मैदान बाहिर उदाहरणीय व्यक्तित्व’ रहेको बताएको छ।

बार्सिलोनाको यस कदमले फिफाले गरेको प्रतिबन्धमा केहि बदलाव नआउने भएपनि मेस्सी र क्लबबिचको सुमधुर सम्बन्ध अझ प्रगाढ हुने भने पक्का भएको छ। क्लबले यस कदमसंगै मेस्सीले नयाँ अनुबन्धन गर्नेमा पनि थप सहयोग पुग्ने विश्वास लिएको छ।

बार्सिलोनाका अध्यक्ष जोसेप बार्टोमेउ हाल मेस्सिका पितासंग उनको अनुबन्धनबारेमा कुरा गर्दै गरेको खुल्नमा आएको छ। बार्सिलोनाले उनलाई अझै लामो समयसम्म क्लबमा राख्न कुनै कसर नछोड्ने बताएको छ। क्लबको यस कदमलाई अध्यक्ष बार्टोमेउले मेस्सी कर छलेको आरोपमा पक्राउ पर्दा ट्वीटर मार्फत “हामी सबै मेस्सी हौं” भन्ने ह्यासट्याग प्रयोग गरेर पनि उदाहरण दिइसकेका छन्।